荃灣享和街司機圖泊錶位遭赤膊男等爆粗指罵 車房東主：職員扯火無法控制
荃灣享和街車房涉霸佔路邊咪錶位情況再掀風波。一名26歲李姓男司機，昨晚8時許與現場一間車房的關姓47歲職員，因泊車問題發生爭執，事件驚動警方到場處理，其後列作「爭執」案處理。涉事車房今日如常營業，東主表示不願評論事件，但提到職員「扯火」一刻無法控制，而警方早上就到場巡查違例泊車行為，東主見狀立即為店前車輛入錶。
▼事主與車房職員爭執逐格睇▼
赤膊男不停爆粗指罵：你最×叻係報警
事主昨日把事發影片上載至社交平台，數段合共長4分21秒的影片可見事主被3男1女包圍，其中一名赤膊男和正進食香蕉的藍衣男不斷指罵事主，「點×樣啊」、「你玩串啊，係咪我哋玩啊」、「喂，你係咪新嚟㗎」、「我打你老×臭×都得啊」、「你最×叻係報警，你啲×家×」。事主多次質問對方「車房係咪包埋個錶位畀你」，藍衣男就強調當時自己正「入緊位」，並一邊推開赤膊男籲其冷靜，一邊繼續指罵事主。
片中女職員持續為雙方調停，向事主稱「佢驚你危險啊」、「好危險㗎人哋郁緊車出嚟」，又叫同事「唔好嘈喇」。事主強調，爭執緣於不滿對方態度差，「你好聲好氣同我講咪得囉，鬼知你架車出緊嚟啊」；車房職員最終稍為移開車輛，讓享和街恢復通車。事主在帖文指，警員到場處理後向他表示會因應事件，「日日過嚟同佢處理霸佔錶位問題。」
▼享和街今日不時有警員到場執法▼
東主：唔係乜嘢大件事
涉事車房今日如常營業，車房東主黃太不願評論事件，稱評論對錯無意思，認為事件只是雙方「條氣唔順」對罵，「唔係乜嘢大件事」，形容全港都有爭錶位事件，又說一直有勸員工與司機以和為貴、「唔好咁易嬲」。不過，她坦言職員被人挑釁的時候容易發怒，「扯火嗰刻我哋控制唔到」，並指當有人「撩交嗌」便無法阻止。車房有另一職員指，赤膊男只是較大聲而不是容易勞氣。
今日早上約11時，有警員到享和街「洗太平地」，打擊違例泊車、逾時未入錶等行為，期間黃太見狀連忙為店前車輛入錶。享和街今日亦成為網民「打卡」景點，不時有人上載警車到場停泊的照片，甚至有警車泊在涉事車房門口。
▼遵守《過馬路守則》應注意事項▼
▼事主與車房職員爭執片段 (含有大量粗言穢語)▼
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)