娛圈單打︱後生聲秀有姿勢　中年吸金至實際

無綫新選秀節目《聲秀》強勢開鑼，今次玩25個後生仔女大雜燴，先唔講唱功，至少有個澳洲選美冠軍喬美莎撐場，有姿勢兼有姿色，論樣已經贏晒今屆班候選港姐，雖然個騷略嫌係舊酒新瓶，仍然令人有期待。

自從TVB分開《聲夢傳奇》同《中年好聲音》兩條線之後，後生嗰班日日扮偶像派，但Fans得班小學雞，反而中佬中女嗰批就個個搵真銀，到底邊批先係大台棵搖錢樹，都唔使多講啦。講到《聲夢》班細路，成班乏善可陳，數來數去得炎明熹（Gigi）一個代表人物，出道冇耐已拎獎拎到手軟，仲威到上央視春晚，奈何少不更事，一跳草裙舞即刻被公司雪藏，咁又係，後生仔女未定性真係好難搞，TVB落重本捧人隨時血本無歸。

反觀《中年好聲音》第一屆龍婷咁，參賽前已經係西洋菜街街頭歌后，雖然被網民笑佢「大媽K歌王」，但人哋真係有班忠實阿叔Fans撐場，商業騷接不停手，仲要夠膽死喺《大師兄Welcome Summer大激戰》着條「阿婆打底褲」彎道超車，同班後生女鬥性感，連女神「貓仔」黎寬怡都要行開，呢啲先叫真實力派。至於近排大熱嗰對《中3》內地孖寶李金凱同劉洋，唱得又有觀眾緣，唔止「拔尖」加入《愛．回家》戲組，《中3》完騷冇耐已經宣布8月殺入麥花臣，真正有價有市，TVB抽佣都抽到手軟。

話時話，反正政府近排大推「銀髮經濟」，TVB下次不如直接開個《富豪聲秀》，唔使再海選咁麻煩，參考小朋友入讀富貴國際學校要買「學券」玩法，課金百萬即可打入百強，專吸嗰班退休隱形富豪，分分鐘賺到盆滿缽滿，咁先至係真正嘅選秀新藍海啊！

東網網站 : https://on.cc/東網Facebook專頁 : https://www.facebook.com/onccnews/