今晚有歌廳︱龍婷陳俞霏唱陳慧嫻經典歌

無綫音樂節目《今晚有歌廳》今日（27日）播出一集嘉賓是《中年好聲音》的龍婷和《中2》的陳俞霏，主題為「陳慧嫻生日特輯」。為配合主題，3位主持及嘉賓輪流獻唱及合唱陳慧嫻經典金曲，包括《逝去的諾言》、《飄雪》及《紅茶館》等。

作為《中年2》評審之一的陳慧嫻，獲主持周國豐形容她為「幾可愛的歌手」，周國豐分享了一個和陳慧嫻之間的有趣小故事，他笑言陳慧嫻擔任《中年2》評審前，竟以「暗語」聯絡周國豐，令周國豐一度誤以為收到詐騙Message：「因為佢好耐冇同我溝通，唔知個電話號碼係咪我，於是個訊息內容就寫『你係咪豐豐啊？我係胃癌姐姐呀。』跟住我喺度諗係咪詐騙Ｍessage呢，咩『胃癌姐姐』呀？」周國豐指當時反問對方是否陳慧嫻，還扮女聲模仿陳慧嫻回覆：「我驚呢個電話唔係你吖嘛！」全場爆笑。

龍婷曾分享了16歲時，因一次實習機會前往廣東，在公園裏偶然聽到陳慧嫻的《飄雪》，令龍婷點燃了愛唱歌的心：「當時我心諗『邊個唱㗎？咩歌嚟㗎？點解咁好聽嘅？』」龍婷指後來得知是陳慧嫻的歌曲時，便開始學習對方的歌：「佢令到我本來明明係跳舞嘅，但後尾點都想要去唱歌。」

至於陳俞霏則分享了「逃婚男友」的故事，她透露就結婚前幾天，男友突然消失，令她極度傷心：「求婚係佢求，我唔係好明，隔咗兩個禮拜佢自己去咗我做嘢嘅城市同我道歉，佢話佢去算塔羅牌，算到唔好嘅嘢，咁所以佢就要走。」

東網網站 : https://on.cc/東網Facebook專頁 : https://www.facebook.com/onccnews/