麻雀樂團｜胡敏芝難忘掌摑謝東閔 緊張指數爆燈 只可NG兩次

無綫劇《麻雀樂團》昨晚（22日）一集，「變態殺人狂」楊堅（林溥來飾）與久哥（譚俊彥飾）肉搏期間，意外被車撞死，幸好久哥靠細微線索、尋回被帶至荒山野嶺的鐵姐（李佳芯飾）。昨晚一集相當多元，開頭的久哥與楊堅肉搏戲，以及尾段久哥經營的「大龍鳳」迎來執笠，都相當緊張；中段由胡敏芝及謝東閔的假分手戲，亦夠輕鬆爆笑。

謝東閔飾演的孝成因要離開香港，到美國繼續發展音樂事業，為免遭久哥算賬，孝成找來程晴（胡敏芝Karen飾）上演「假分手二重奏」戲碼。孝成先「安排」平時膽小如鼠的程晴，在與其他人吃飯期間，無緣無故發脾氣；之後急於「大結局」的金成，更逼程晴在眾人面前摑他一巴，為分手戲劃上句號，但由於程晴太細膽和緊張，最終被久哥揭穿做戲。

談到這場「假分手」戲分，胡敏芝受訪時笑言，拍攝時因要打人相當緊張，還因拍攝機會只得兩Take，令她的壓力指數更高：「之前都有綵排要打邊個位，我係好驚，因為我要打人，仲要打東閔喎，都有啲壓力，其中一樣係驚係咁NG。當時情况唔可以NG，因為係戲中戲，根據劇情東閔係要撕爛預先寫好對白，嗰張紙係手抄嘅，total得2張，佢淨係可以撕2次、亦變相我只有2次打佢機會。」

Karen昨日受訪談到該場掌摑戲時，仍緊張至聲震震，恍如重返當時拍攝情緒一樣，Karen聲震震說：「係好驚呀，我寧願畀人打咯，我都驚佢會痛。但導演就教我方法，話如果我要作勢打佢、想顯得大力啲，我隻手係要向後發過去，同埋唔好打面珠，要打下巴上少少，咁樣會冇咁痛，但又會有聲。我尋晚睇預告，都覺得拍出嚟好似好大力咁，但我唔係好用力咋。」

（即時娛樂）