BIG FOUR紅館騷預告多Solo：大家冇私心，只有包容

組合BIG FOUR的3場紅館演唱會即將假紅館舉行，4位成員張衞健（Dicky）、許志安（安仔）、蘇永康（康仔）和梁漢文接受電台DJ余宜發訪問大談兄弟情，安仔感恩透過籌辦演唱會，令兄弟情更親密：「之前大家真係少見面嘅，多數都係WhatsApp聯絡，因為有啲成日唔喺香港，有啲生活節奏又唔同咗，大家好難有機會走埋一齊，有段時間（疫情期間）晚上食飯都唔畀嘛，但係去年有人提議搞BIG FOUR演唱會，我哋4個都覺得幾好喎，呢個Timing係自己走出嚟。」已育有一子的康仔亦謂因要照顧年邁母親又要湊仔返學，現時要早睡早起，早已謝絕晚間飯局。

談及4子各自有大量經典作品，Dicky表示演唱會歌單上要忍痛刪歌，他說：「喺2至3小時演唱會上，佢哋3個咁多歌，其實我都唔少，所以要斷捨離，而參考12年前嘅經驗，今次應粉絲要求，Solo嗰Part會多啲。」至於新圑歌《赤子們》，安仔自言人生有好多事物、環境會改變，但當追尋回BIG FOUR的赤子之心時，就會發覺力量無限，因此他們想將這份能量及感覺分享給歌迷。

Dicky續說亦因BIG FOUR有赤子之心，所以才能維繫數十年友誼：「大家係冇私心，只有包容，否則難做幾十年兄弟，我哋完全冇嗰啲點解張海報佢個人大啲、佢個位又偏嗰啲嘢。」又以夫妻作比喻，能做二位一體的夫妻已不易，三位一體的兄弟就更難，現BIG FOUR可以「四神合一」則是難上加難。

東網網站 : https://on.cc/東網Facebook專頁 : https://www.facebook.com/onccnews/