網上熱話｜女model搭飛機遇恐怖鄰座 赤腳亂踩+正對臉極嘔心 無做1事反被網民圍攻

搭公共交通工具遇恐怖乘客，部分人可能本著「好快落車」的心態決定忍一忍，但如果搭飛機遇上無公德心乘客，未知你又會點做呢？女model穎嵐早前就在社交平台發文，苦呻自己搭飛機時就遇上極度嘔心的鄰座，而她上傳的照片更令一眾網民大叫十分難頂！

女model搭飛機遇恐怖鄰座

穎嵐在社交平台上發文，苦呻自己日前乘搭飛機時遇上恐怖鄰座。從她上傳的照片中可見她的座位是飛機中間3連座，事主坐在最左手邊，中間和最右乘客應該互相認識。最驚人的是，坐在中間的乘客不但除鞋赤腳踩上櫈，踩到過晒界伸入事主座位，更棟高起隻腳，對正她的臉頰！

落機後悔無做1事

穎嵐在機上除了影相紀錄鄰座的舉動外，竟然未有出言阻止或叫空中乘務員幫忙，令她不禁在帖文中寫道「我竟然全程機都冇出過聲，而家落機諗返好後悔」，更輕斥自己指「我頭先到底做緊啲咩」。

網民無奈留言：你仲癲過佢

穎嵐上傳的照片震驚一眾網民，有網民表示「你自己做完懦夫而家仲要post出嚟激我哋」、「除非呢隻腳板底係屬於許光漢或車銀優，唔係我諗唔到任何原因唔出聲」，亦有人笑稱「樓主忍受能力程度：鑒定為印度」。惟大部分網民就反指事主「太忍得」，揚言「咁都忍到，屎都可以食了」、「你隔離條友癲啫，你仲癲過佢，呢啲情況撳鐘叫空姐處理就得，洗乜自己開口」、「真心講，你癲過佢」。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)