林盛斌遇騙徒扮老人院職員呃代言：撈咗20年都未遇過

藝人林盛斌（Bob）交遊廣兼於圈中吃得開，同時卻遭不法之徒「利用」，除早前網上不斷流出以其名義開設的假帳號外，近日更發生一單「怪事」，幸而被他及團隊無意中識破﹗他於社交平台以千字文透露﹕「話說早兩個禮拜前，我經理人Kaman收到個查詢，對方李先生send咗張卡片過嚟，話係旺角一間老人院嘅負責人，佢話佢哋想搵我做代言人拍廣告，仲想我哋棋人（公司）幫佢喺唔同媒體落廣告。跟住大家傾到代言人價錢同埋詳細嘅工作內容，Kaman仲好畀心機咁做咗份合作建議書，job confirmed！」

原本歡天喜地接下的工作，最終竟是騙局一場，Bob續寫道：「Kaman想喺拍廣告同影宣傳相之前大家見面，順便睇睇佢哋老人院實質環境，兼傾一傾個拍攝內容。到咗上星期五下晝2:55，我哋去到呢間老人院門口，Kaman就打電話畀呢位李先生話畀佢知我哋到咗，然後對方話：『唔係約咗聽日咩？我啱啱出咗去，半個鐘後先返。』我哋就入去老人院嗰度諗住坐低等佢返嚟。好啦，高潮嚟啦，我哋同接待處個職員講話我哋約咗李生開會，然後個職員就黑人問號：『李生？邊個李生？我哋呢度冇呢個人。』」

據悉，該老人院已得悉近期不斷有人冒老人院名義訂購不同物件及貨品，甚至找裝修公司問價裝修，故早前已主動備案：「呢個時候Kaman不斷打電話畀呢個李先生，對方已經冇再聽電話，冇任何回覆。呢一刻我哋幾個人，進入咗懷疑人生嘅狀態，真係千年道行一朝喪，出嚟撈咗20年，第一次遇上呢啲點估都估唔到嘅劇情！」

Bob昨日受訪補充指自己未有金錢上損失，但坦言：「唔係好明佢嘅目的，但有叫我經理人幫手買新嘅輪椅，咁佢梗係話唔方便啦。」他直指工作關係很難杜絕所有陌生人查詢，倘若對方是真的，就會搞到情況很尷尬，日後亦只能做到盡量「執生」。

東網網站 : https://on.cc/東網Facebook專頁 : https://www.facebook.com/onccnews/