江若琳招財貓報恩帶挈吸金　「二仔」有病崩潰爆喊

歌手江若琳（Elanne）家中「糯米糍」及「金寶湯」兩隻招財貓齊報恩，多得「廿四孝貓奴」之名，為她帶來無限商機，獲寵物保險垂青邀請拍攝廣告外，其在網上影音平台「消失了」長達10年的所有歌曲，終於可以再度上架，令她有重新感覺。

即將舉行演唱會的Elanne日前拍攝寵物保險廣告時，表示和廣告商特別有緣，昔日是保險客戶，現再更成為合作夥伴，而最受惠是可跟「貓奴」們交流心得，其中一個案更令她感受最深：「我個二仔『金寶湯』上年突然唔食嘢又持續發燒，不停同佢跑寵物醫院，乜都驗齊但又查唔出係咩病，病情仲愈嚟愈差，最慘係嗰時老公出外公幹，我又要湊住個仔，當有個醫生同我講貓貓可能患上貓界絕症嘅腹膜炎，我跌咗落地獄咁，成個人崩潰晒，壓力大到日日爆喊，老公都話改機票返嚟陪我，但我係佢哋阿媽，要堅強。」最終「金寶湯」被確診患胰臟炎及胃炎，雖然未致無藥可醫，但手尾很長，她又坦言自從養貓後，最怕貓貓生病，跟天下貓奴一樣說：「寧願病嗰係我。」

問到愛貓如命的她，家中成員的排位，她老實不客氣謂：「梗係個仔排先，之後到兩隻貓，我都教個仔叫啲貓做『哥哥』，老公由頭到尾都係『阿四』，佢知呀，仲好樂意添。」

談及兩隻貓即將分別達入9歲及5歲，作為主人最怕牠們離世，所以Elanne和老公Oscar特別珍惜和貓貓相處的日子，她表示：「囝囝開始可以一個人瞓，有日『糯米糍』跳上床同我哋一齊瞓，令我諗番起同老公拍拖時，初初養『糯米糍』嘅日子，我有同佢講希望佢健康同長命啲，因為佢係我哋第一個『仔』。」

另外，她自爆開心事，指之前跟前公司打官司，因而在前公司期間所推出的歌曲，要在影音平台全數下架，但現取回所有版權，歌曲亦終於可重見天日，她說：「啲歌消失咗10年，依家啲歌迷可以重聽番我啲歌，真係好感動，覺得呢個時候係最圓滿人生，我好似重生一樣。」

服裝提供：PortsPURE

東網網站 : https://on.cc/東網Facebook專頁 : https://www.facebook.com/onccnews/