娛圈單打︱嫖賭飲樣樣皆精　冇嘢撈又使乜驚

生意淡薄，不如賭博。憑《大叔的愛》爆紅嘅日本已婚男星田中圭，因為偷食玉女永野芽郁而形象插水，做完舞台劇後陷入停工狀態。冇嘢撈不如搵秘撈，佢日前現身美國拉斯維加斯，參加2025世界撲克大賽，居然畀佢贏咗個第3名，11萬幾美金袋袋平安，真係唔到你唔服。

雖然田中圭又戴漁夫帽，又蒙面戴口罩，由頭包到落腳，但一樣被在場人士認出。佢索性不再裝，老實不客氣舉手大叫「我出戰啦」，隨即落場搏殺，展現精湛牌技，最終畀佢執咗身彩，贏得獎金。大叔的愛大戰拉斯維加斯，果然非同凡響！

之不過，男人最忌嫖賭飲蕩吹，衰齊咁多瓣咯喎，會被視為無可救藥、渣男之中嘅極品！按此路進，田中圭起碼衰咗嫖賭飲三瓣先！冇屈佢㗎，就算佢同永野芽郁之間係「真愛」，唔存在「嫖」嘅關係，但過去曾被知名媽媽生踢爆，與旗下多名紅牌舞小姐上床，識飲識食；疫情期間又被傳媒揭出，條大滾友背住老婆去夜店買春，簡直澩咁嫪。

至於「飲」咯喎，佢更係出晒名，經常醉酒鬧事。曾經飲醉酒無法支付的士車資，鬧到上差館；甚至同石原聰美合作拍劇期間，因為宿醉開工，而令脾氣甚好嘅石原發火，破口大罵。佢最初同永野芽郁搞埋，亦係藉口飲大咗，要芽郁照顧，家陣仲沾埋「賭」呢一瓣，你話呢啲男人係咪唔使恨呀？

至於芽郁亦唔好得幾多，辭演大河劇後無所事事，被發現染咗一頭狂野金毛飛赴外國散心，一於將玉女形象徹底拋棄。呢對「姦夫淫婦」同是天涯淪落人，橫掂咁得閒，會唔會約埋喺賭城打番場友誼波呢？

東網網站 : https://on.cc/東網Facebook專頁 : https://www.facebook.com/onccnews/