關智斌時隔6年再開騷　晒「暴乳」谷飛

歌手關智斌（Kenny）時隔6年再開騷，將於9月26及27日於啟德體藝館舉行一連兩場的《The Endless Adventure Live in Hong Kong》演唱會。今日Kenny演唱會海報曝光，着上Deep V的他打出心口，露出震撼「暴乳」，他自爆拍攝海報時全場焦點都落在他的胸肌上，笑言：「因為件衫開胸，成個團隊無論目光定相機，全部都對住我波罅，好彩我有操開，都見得吓人，唔使尷尬！」

Kenny近來勤力操肌，身形甚Fit，早前還參加健身比賽。對於造型性感，Kenny搞笑稱：「為咗賣飛吖嘛！點都（露）少少啦！希望可以幫到百零二百張飛啦！咁就功德無量喇！」是次演唱會以「小飛俠Peter Pan」為概念，Kenny解釋並非要扮小飛俠，他表示：「細個已經好鍾意睇呢套卡通片，不過我唔係扮Peter Pan，而係用冒險島嘅精神，講成長嘅矛盾同掙扎。」海報造型亦暗藏玄機，綠色撕裂衫的一邊代表小飛俠，另一邊就似邪惡船長Captain Hook，就好似正義和邪惡在身上開戰，打到衣服撕爛。

Kenny的「暴乳」海報惹來網民熱烈討論，MIRROR副隊長AK亦搞笑留言：「收返埋個八字，唔好亂咁畀人睇！」DJ梁文禮就簡單寫下４個字：「豪乳警報」。同公司的兄弟姊妹包括謝霆鋒、容祖兒、蔡卓妍、鍾欣潼、李幸倪和泳兒亦紛紛在自己社交平台轉發演唱會消息力撐。Kenny表示今次演唱會不僅是一場演出，更是一段成長路上不斷冒險探索的旅程，要有面對無常世界的勇氣，「在這一個你我都不會長大的晚上，將由『永遠的彼得潘』帶領大家，找屬於自己不一樣的答案。」又預告演唱會將有好多跳舞部分，編排精彩，笑言自己也看了十多次，保證沒有悶場。

東網網站 : https://on.cc/東網Facebook專頁 : https://www.facebook.com/onccnews/