羅家英自爆愛上「按Pat Pat」　爆19次同汪明荃求婚真相

藝人羅家英日前受訪豁達談論4度患癌的心路歷程，更坦認性慾全失，真情剖白掀起熱話，在新一集節目中，羅家英繼續敢言作風，直言近年少去揼骨卻愛上「按Pat Pat」，更大彈汪明荃演粵劇「跌咗分」。

4度患癌的羅家英宣布放棄電療與化療，他表示：「阿姐（汪明荃）冇畀意見我，不過我諗佢係同意嘅，佢都係出嫁從夫丈夫話事，何況條命係我嘅，佢點話到事呢？」之前有跟汪明荃談及過，戲言對方沒有專心聽，之後報道出街後，二人都沒有為此特別去傾談。

問到汪明荃當年是否也是看到羅家英揼骨的報道才知？他笑言：「佢贊成我去揼骨㗎！佢仲幫我Book埋房𠻹！依家少咗去，以前好燥，腰骨好赤好攰，但揼骨都冇特別好到，後來買咗按摩器，將按摩器放落自己個Pat Pat度，原來條腰攰就係因為Pat Pat嗰條筋，你將佢鬆咗，我行好多路，以前行一個鐘頭要抖，但依家唔使！」

羅家英近日正籌備劇本《柳如是》，他表示自己適合做「錢謙益」，笑指角色70歲都都能搵到後生老婆，是達成所有男人的心願。他又指汪明荃改變了他：「以前我唔鍾意同人哋辯論，唔鍾意解釋、唔嗌交，大家嬲爆爆唔出聲，依家唔係，坐喺度講啦！（通常邊個拗贏？）睇吓邊個有道理，好多濕濕碎碎嘅嘢要拗，佢係好堅強、好硬頸，自己認為啱嘅嘢就去做，但佢認為啱嘅嘢未必係啱嘅，講道理咋嘛，佢認為啱聽就聽，唔啱聽就算！」

最經常跟汪明荃爭拗的話題，就是講粵劇，他說汪明荃不太喜歡演粵劇，對她的粵劇演出有何評價？他勇者無懼：「跌咗分！87年、88年，佢同我做《穆桂英大破洪洲》，如果佢嗰時係90分，依家最多得番70分！（你小心啲喎！）唔使小心，佢係鬧我，話我唔讚佢，但我唔係鍾意讚人嘅人，我真係好衰，我最多話幾好、幾好，如果我讚你嘅時候，就係我嬉皮笑臉：『你冇得頂，去到天咁高！』但呢啲讚係假嘅！」之後羅家英不忘讚老婆補鑊：「佢係一個比較好心腸嘅人，佢能夠同我拍拖，我有啲感恩！（你求咗19次婚先搞掂？）邊有咁多次呀！做新聞啫，不如話佢求我結婚，我唔應承19次！」

東網網站 : https://on.cc/東網Facebook專頁 : https://www.facebook.com/onccnews/