關智斌相隔6年再開騷 曬巨胸谷飛 AK：收返埋個八字

關智斌（Kenny）相隔6年，終於再舉行個人演唱會《The Endless Adventure Live in Hong Kong》，這次選址啟德體藝館，演唱會將於9月26及27日一連舉行2場。Kenny自爆拍攝海報時，全場焦點都落在他的胸肌，笑言：「成個團隊對住我波罅影相，好彩我有操開！」

這次演唱會以「小飛俠Peter Pan」為概念，Kenny解構：「細個已經好鍾意睇呢套卡通片，不過今次我唔係扮Peter Pan，而係用冒險島精神，講成長矛盾同掙扎。」海報造型原來暗藏玄機，綠色撕裂衫的一邊，代表Peter Pan，另一邊就似邪惡船長Captain Hook：「好似正義同邪惡喺我身上開戰，打到衫都撕爛埋。」

講到件衫性感，Kenny即鬼馬說：「為咗賣飛吖嘛！點都（露）少少啦。」他又笑言：「希望咁樣可以幫到百零二百張飛啦，咁就功德無量㗎啦。」Kenny直認近來操練得好弗，除了為演唱會，亦因為早前參加健身比賽，隨後又大爆拍攝海報期間的趣事：「因為件衫開胸，我成個團隊無論目光定相機，全部都對住我波罅，好彩我有操開，都見得下人，唔使尷尬！」

不少網民都將焦點落在Kenny這張海報上，連AK（江𤒹生）@MIRROR也忍不住留言：「收返埋個八字，唔好亂咁俾人睇！」公司一班兄弟姊妹如謝霆鋒、容祖兒、蔡卓妍、鍾欣潼、李幸倪、泳兒等，都紛紛於社交平台轉發演唱會消息，落力支持。

（即時娛樂）