【升中】升中人數減少 家長心態進取 老師:去年博失人數高一倍
隨着升中學生的數目逐年減少，入讀理想學校的機會理論上會較以往高，許多家長在統一派位決定「博一博」，就連不少升學專家建議可以較進取地毋須設立「安全線」。然而有小學教師認為「博失」的後果較以往更嚴重，呼籲家長必須謹慎選校。
Photo from MamiDaily
選校博高一個水平
為孩子揀選心儀的中學絕對是一門學問，每位家長都希望孩子盡可能入讀排名較高的學校，為孩子提供更理想的學習環境，故此在統一派位中，幾乎首三個志願都選擇較熱門的學校，甚至有家長選擇超出孩子目前水平的學校，譬如Band 2C的學生選擇Band 2A甚至Band 1C的學校「博一博」。
統一派位程序複雜
學生如想升讀政府資助的中學，便要參加「自行分配學位」和「統一派位」兩階段的學位分配。一般學校會先預留大約三成的學位作首階段的自行分配學位，亦即用作取錄通過自行面試的學生，其餘則會用作第二階段的統一派位。
如果本身品學兼優而與自行分配學位選擇的學校情投意合，面試表現理想的情況下便可直接考入心儀學校。至於統一派位程序較為複雜，主要是根據學生所在校網、派位組別、選校意願、以及隨機編號分配學位。
派位組別亦即大家俗稱的Band 1至Band 3（第一組別至第三組別），而依據三次呈分試的成績，每組別可再細分為A至C，Band 1A即俗稱的Band 1頭；Band 3C即Band 3尾。呈分試可讓學校、教師、家長和教育局準確評估學生的學術表現，從而挑選合適的學校。
Photo from MamiDaily
家長盲目追求Band 1
在油尖旺區一所小學任教的何老師表示，她任教的學校學生水平大概在Band 1C至Band 3B左右，基本上考獲全級前十名的學生，她會建議統一派位時首兩個志願可選擇Band 1B至Band 1C的學校，第三個志願已要選Band 2A的學校打「安全牌」；而如果水平只達Band 2A甚至Band 2B的學生，她一律建議盡量選擇自己水平的學校，不要「博大霧」。
何老師謂每當家長填統一派位表時，經常詢問能否選擇Band 1B甚至Band 1A的學校。
「其實大家以為名校易入咗，可能或多或少確實易咗，但個個家長都想『博』嗰陣，自然博失嘅都多，仲會搞到得不償失。」她說。「我會鼓勵如果本身水平唔錯嘅學生進取啲，但如果本身水平普通，例如Band 2B以下嘅學生，真係揀番合適自己水平嘅學校。」
Photo from 《皮諾丘》劇照
選校組別重要 隨機編號更重要
何老師表示，統一派位機制不會在每個組別細分A至C，意味Band 1C的學生在統一派位時不太會輸蝕予Band 1A的學生，隨機編號起着至關重要的作用。
何老師說：「如果A學校只剩一個學位，Band 1C學生嘅編號優先過Band 1A嘅學生，而兩個都選擇呢間中學作為第一志願，學校就會收Band 1C嘅學生，變咗Band 1A嗰個會落選，所以我一直建議如果係Band 1學生，我覺得應付到就可以博第一志願，個編號大家都係撞彩。」
至於Band 2學生，她不建議越級博Band 1，「如果本身係Band 2嘅學生去博Band 1，風險就會好高，因為派位會先派晒Band 1嘅學生先，之後先到Band 2，基本上到時Band 1學校啲位已經唔剩好多，極其量只可博啲較冷門嘅Band 1學校，如果過份進取揀Band 1名校，基本上等同浪費咗第一志願。」何老師續道。
Photo from 《季前賽》劇照
博失的後果嚴重
何老師表示，以她去年任教的小六為例，成功「博贏」入到較預期理想的學校的學生人數與過往相若，但「博失」的學生人數較以往高一倍，當中大多為Band 2學生。
何老師說：「我班去年有個Band 2A水平嘅女仔，頭兩個志願都揀咗Band 1中學而派唔中，第三志願揀番一間Band 2A，點知都派唔到，最終派咗一間Band 2C！」
「我當時同媽媽講，叫佢拎住成績表即刻去叩門，最終入到一間校風唔錯嘅Band 2B學校，但仍然同理想爭一截。」
她坦言，Band 2A的學生家長最想博入Band 1，但成功例子寥寥，一旦失手隨時被Band 2C的學生取而代之，連本身較佳的Band 2學校都派不上。
Photo from 《少年派》劇照
睇餸食飯
隨機編號等同「抽籤」，何老師認為運氣成份十分重要，故無時無刻都應打安全牌，以免最終要四出叩門，更重要是學生必須「睇餸食飯」，盡量不要選擇較自己組別更高的學校，因為要博入幾乎不可能。
「唔好抱住僥倖心態諗住博得入，以前大家都唔博以穩陣行先，如今個個都博，變咗名校仲難入咗，Band 1A學生如果抽支籤唔靚，都可能入唔到心儀嘅學校。」何老師謂。
始終統一派位中有太多隨機因素，何老師寄語成績優秀的學生如想確保入選理想學校，應花時間準備第一階段的自行分配學位，憑硬實力面試考入心儀學校。
延伸閱讀：
【兒童發展】雙胞胎兒子成長進度差距一年 媽媽籲父母平常心看待成長里程碑
Text：Mami Editorial
留言 1