亨仔陳安立懶理形象 用籃球塞爆全身 七師傅讚「愛晴當入樽」好名

ViuTV節目《公司逼我打籃球》由6月23日起，逢星期一至五晚上9時30分播出。節目主軸在於公司逼一班有籃球經驗的藝人建立籃球隊，逼藝人接受不同形式籃球訓練，組隊與不同單位比賽以驗證成果。

今晚（24日）播出第2集，節目組準備為球員製作球衣，當中有4位藝人不約而同地挑選了NBA傳奇球星高比拜仁（Kobe Bryant）的代表性球衣號碼「8」和「24」號，其中陳安立（Brian）和陳鎮亨（亨仔@ROVER）挑選了「8」，而王希晉（希晉@ROVER）及歐鎮灝（George@P1X3L）則挑選了「24」。

為爭奪心儀號碼，Brian和亨仔需於「持球耐力賽」中，要盡量將最多籃球維持在身體任何位置5秒或以上，持球數量較多者勝出，Brian十拿九穩地笑言：「我覺得我唔會輸，除咗鬥拗手瓜之外，我諗唔到我有乜嘢可以輸俾佢（亨仔）。」無所不用其極的亨仔，馬上把籃球塞進衛衣入面，甚至把籃球塞進褲襠，Brian亦參考亨仔做法，2人不顧形象用籃球塞爆全身，場面搞笑。

節目組邀得七仙羽（七師傅）擔任本集嘉賓，七師傅大讚球隊名稱「愛晴當入樽」是個好名：「因為你哋全部都好Lonely吓嘛？都需要啲愛情，同埋愛係最偉大，愛係最高能量，當你哋揸住愛出去比賽，咁你一定會贏！你比賽不是為了砌低別人，你比賽係為咗愛。」七師傅亦為球員派發已加持的幸運手帶，祝福他們訓練順利。

為了提升藝人核心力量，籃球教練梁振雄（Coach Fui）安排高強度間歇訓練（HIIT），各藝人都筋疲力盡，球隊經理人王家晴（Candy@COLLAR）指：「原來經理人都唔易做！諗番起我哋當初準備演唱會嘅時候，嗰陣我哋經理人都有一齊做HIIT，雖然佢淨係做咗2次，啱啱同佢哋做就諗番起，原來經理人同球員一齊做HIIT，係有種共同進退，以身作則嘅感覺！」

（即時娛樂）