Tyson Yoshi簽字結婚成為人夫　恨生一對仔女

歌手Tyson Yoshi最近已簽字結婚，今日（26日）現身活動，他稱成為人夫前後分別不大，問他註冊後有何感受？他笑言：「法律上離婚就要分身家。（有冇簽婚前協議？）唔需要。（成副身家畀晒佢？）可能佢畀晒我，過幾年我就食軟飯，哈哈！」他指兩人有共同戶口，讚太太從來不會管他如何用錢，而自己花錢亦很有分寸：「佢真係幾好，我朋友買嘢前經常要問太太，但佢從來唔會過問，我買過最貴係買車同手錶。（可能結婚後就會管你？）我有計劃，生仔前買兩座位嘅車，到小朋友大咗，我就會賣晒啲車，轉買七人車。」

提到張敬軒揚言有條一擊即中生仔秘方給他，Tyson開心謂：「有梗係好，唔使浪費時間，我準備好，我哋已經一齊好耐，唔需要再有二人世界。心目中最理想係生兩個，一仔一女，生4個就太嘈。」

Tyson將於7月在歐洲舉行婚禮，不過婚禮前先搞個唱，他透露現正積極籌備當中，婚禮就交由太太全權安排，自己只負責出席。他表示為個唱而減脂，已由71公斤減到67.5公斤，但教練仍未滿意。講到作為婚前最後一個演唱會，會否大派福利？他說：「冇， 露上半身已經係我嘅底線，再露多啲嘅話，除非有苦衷先會咁做。」又指就算成為人夫後仍舊歡迎大家拋Bra上台：「以前啲人獻花，新時代就掟Bra，幾好。（掟男裝底褲得唔得？）我收過，當拋喺空中嘅時候，我已經用0.1秒去無視佢。」

另外，近日Tyson將跟張家輝的合照放上社交網，他稱當日看電影時在戲院巧遇對方，還被對方取笑自己看卡通片《史迪仔》，問到家輝有否撩他合作？他坦言：「冇。（想唔想合作？）我可以寫首歌畀佢唱，但演戲嘅話我怕，其實一直以來都唔少人問我拍唔拍戲，但我覺得自己演技偏屎波，拍多啲MV磨練吓先，唔想一拍就畀人留下唔好印象。」

東網網站 : https://on.cc/東網Facebook專頁 : https://www.facebook.com/onccnews/