女神配對計劃｜Kris跳出I人框框變主動 「求愛五招」冧羅毓儀

無綫戀愛綜藝真人騷《女神配對計劃》，明（3日）晚播出第9集。《女神》除了葉蒨文Sophie與曾展望GM（簡稱GS）夠晒Sweet，另外兩對CP羅毓儀Yuki和林俊其Kris，及梁敏巧Maggie和劉啟進Matt，同樣發展神速，Yuki與Kris被拍到當街拖手仔，雖然只是gentlemen式拖手，但隨著2人承認互有好感，這對CP在節目中的甜蜜互動，亦成為焦點。

之前予人感覺Yuki較主動的「I人CP」，今集將會出現逆轉，一直強調自己是I人的Kris，主動向Yuki展示「猛烈求愛五式」：送暖身黑糖薑茶、為凍到震騰騰披上愛心外套、送親手手繪公仔的水杯、「（蠟筆）小生眼神」請求女方讓他同牀，以及霸總式親親，花款多又相當冧。

Kris的五大強攻之中，以「除外套」一招最有「迴響」，事緣Kris在眾目睽睽下為Yuki披上外套，全場起哄，GM還問Sophie：「你凍唔凍？」被冧得勁開心的Sophie不忘狙擊GM：「你有得除咩？嚟吖！」現場忽然爆發除衫潮，有穿外套的黃家俊Matthew及陳昇、分別為自己女神關嘉敏Carman及李芷晴（Stephanie）披上外套，十分熱鬧。

至於「黑糖薑茶」，則展現Kris心思細膩的暖男一面，原來Kris入Camp前已知道Yuki身體不適，一早準備黑糖薑茶送給女方，還為送薑茶的Perfect Timing煩惱不已，難怪Yuki全程笑到腰果眼。

玩遊戲時，Kris亦積極兼主動，在與Yuki合作玩遊戲時，為了表達「接吻」這條題目，站在後面的Kris火速將Yuki的頭轉向自己。事後Yuki定格兼面紅。之後進擊的Kris與Yuki同房後，繼續強攻出招。

首先他向Yuki送上自己親繪的Yuki卡通樣水杯，裏面還寫上了「A Smile Starts Here」，再次令Yuki深深冧倒。2人討論牀位問題，原本被安排睡梳化的Kris，為爭取與女神同牀機會，全程以「小生眼神」攻擊Yuki，又扮慘表示沒被冚好可憐；Yuki終於屈服，並大叫一聲「咦」釋放內心害羞。Yuki搞笑解畫：「張牀又唔係好細，佢就算瞓咗都有空間嘅。」

梁敏巧Maggie和Matt這對「M&M CP」，今集都有感人位！2人因為玩輸遊戲，被罰邊公主抱邊食百力滋，畫面勁刺激，其他女神及求愛勇者，化身花生友，各自拿出電話拍片影相。是次已是Matt第N次體力勞動，成為節目「肌肉擔當」。

Maggie事後與閨密談及被Matt再次公主抱時，亦笑言：「我feel到佢個胸肌好大。」因為細心又老實人氣持續上升的Matt，Camping時還向Maggie送上來自日本的手信「窩心黑朱古力」！Maggie曾向Matt透露喜歡吃黑朱古力，Matt於日本旅行時花心思搜羅最好的黑朱古力送給Maggie，令Maggie未食已甜在心頭。

（即時娛樂）