谷婭溦宣傳新歌 自爆曾被欺負：依家學識Say No！

歌手谷婭溦（Vivian）今日（3月11日）來到新城廣播參與啤梨主持的《梨事會》接受訪問，宣傳新歌人性四部曲嘅第四步曲《性本善》，她表示係因爲經歷咗好多事先可以寫出關於人性四部曲「真假善惡」，溦溦坦言入行初期受過不少人的欺負。同時分享努力籌備新劇和兼顧歌唱學校的近況。

溦溦在宣傳過程中被問到有沒有曾經被「蝦」，她自爆：「當然有啦！就係因爲經歷咗好多嘢先可以寫出關於人性四部曲，可能自己冇咁lucky，但係當你經歷過呢啲嘢嘅時候，反而到最後冇甘多負面諗法。」

畀人「蝦」應該點反擊？心態應該點轉變？溦溦說：「一開始真係冇辦法，只可以『硬食』，時間長咗，成長咗之後，學識咗一樣嘢就係要識得『say no』，唔識得拒絕就會畀人不停咁『蝦』落去，無論係行爲或者言語令自己唔舒服就要拒絕，如果我沒有明確地令對方知道我唔舒服，係我自己問題，如果對方知道後，仍繼續欺負我，就係對方問題。」

除咗新歌，作爲新人演員嘅溦溦同樣都拍緊新劇，「大家都好期待，好勁嘅casts，對戲嘅都係前前輩。」坦言係自己第二次拍劇，因爲太想做好，所以壓力好大，希望自己唔好咁緊張，可以放鬆，用自己上台唱歌嘅enjoy嘅感受去做戲。

除咗創作新歌、拍劇，溦溦還要兼顧歌唱學校，真係一啲都唔容易！溦溦就話：「因爲自己都有負責教，驚自己冇咁多時間會影響學生學習嘅進度。」她自言其他方面冇咁擔心，因爲仲有partner幫手安排學生時間，開設歌唱學校最初目的係幫到有音樂夢想嘅大家，但與拍檔略有分歧，「拍檔覺得唔夠商業化，因爲我冇諗過賺錢」，不過她與拍檔都希望可以幫助有潛質嘅學生可以出道做歌手。

圖片：新城廣播