80年醬園面臨收地問題 前名人飯堂老闆再入廚顯身手

谷德昭主持的ViuTV節目《消失的味道》明晚（8月1日）播出最後一集，探訪紮根香港80年的悅和醬園。悅和醬園第三代傳人龐中衡表示現時最大的問題是收地發展，很多同行結束營運也是因為沒有繼承人。他說：「普遍依家嘅第二代已經7字頭喇，佢哋嘅問題就係好多佢哋冇第三代或者第四代返去接手。要收地嘅時候，一班已經70多歲嘅人再去同政府搞搬廠，可能講緊呢個動作一搞就已經係10年」。

高榮新是前名人飯堂「大喜慶」老闆，餐廳因為業主加租而結束營業。高師傅之後回到鄉下番禺開設私房菜和經營醬料，現在年事已高的他精神、體力也不復當年，已退出廚壇。高師傅回想10多歲開始跟隨爸爸學廚做到會：「嗰陣時好力到又擔又托又抬，7、8樓都係咁托上去。依家企都企唔穩，真係歲月不饒人。」製作組特別邀請高師傅與其兒子Ken到豉油廠，以醬園的出品烹調出4大菜式，包括頭抽煎大蝦、乾炒牛河、米酒煮雞以及麵豉焗魚頭，與上一輯《茶餐廳》的受訪者一齊食飯聚舊。

（即時娛樂）