柯煒林公布確診後首開直播　變身抗癌KOL自創地獄笑話

現年33歲的柯煒林（Will）前日（7月30日）在社交平台宣佈自己確診肺腺癌第四期，剛剛開始食鏢靶藥。Will自言打慣逆境波，「如常生活，生活如常」，又表示「唔使過份擔心，我仲行得走得，正常生活。」昨晚（7月31日），向來喜歡晚上開live的Will如常在IG開直播，分享目前的抗癌心情，更自創多個地獄笑話，又笑指自己的IG followers一日間的升幅比癌細胞成長得更快。

Will全程笑住開直播，又不時把自己患癌一事拿來開玩笑，笑稱為自己的酒窩改名叫「CD」，即「cancer dimple」。當發現直播有3000多人觀看時，Will笑著爆粗︰「3000幾人睇，我變咗抗癌KOL，X你老味，我慣咗之前得幾十人睇。」他叮囑大家千萬別叫他做「小鬥士」或「勇士」：「嗰啲咩勇士，好似247要奮鬥咁，我要攤喺度，做抗癌小廢青！」之後他公開徵集更有型的封號：「有冇再響朵嘅名？帶點厭世又不失幽默嗰啲。」不少網民紛紛響應留言，Will即時讀出「抗癌chill guy」、「癌柱」、「廢（肺）之呼吸」等。他又說︰「如果要出歌，首歌會叫《絕不擴散》。」

Will直言，如果不是本來有舞台劇演出，他不會公開自己患癌，現在仍然希望到時可以上台。他在直播中間中有咳嗽，但表示接受治療後已咳少了。Will自言暫時行得走得，狀態還算可以，「除咗呢part」（指著其胸肺位置）。他表示：「希望呢個蜜月期唔好咁快過！」、「感恩係醫生話我呢個case可以食藥控制，唔需要做標靶藥以外嘅治療，所以仲可以如常生活。」

積極抗癌的Will透露：「我會努力去打贏佢，但喺我打仗或者同佢並存之前，我係要學識接受我有可能輸。因為我接受有可能輸嘅時候，我就冇嘢驚，剩低就係要好好向前行。」他表示：「唔使太擔心我，過去呢15年醫治癌症方法好多，我仍以on X仔態度面對。」直播於半夜12時結束，Will把燈光調至最暗，播放著輕柔音樂作結。