ZEN成軍30周年騷　隊友狂催婚承諾下年派利是

樂隊ZEN 1995年成軍，主音黃和興（阿興）、低音結他手鄭偉鴻（阿鴻）、結他手鄧明輝（阿輝）和鼓手關禮琛（阿琛）昨晚（23日）在麥花臣場館舉行成軍30周年首個演唱會《Back To You》，不少圈中人捧場包括樂隊Dear Jane的Tim、Jackal及Nice、吳浩康與太太郭思琳、潘紹聰、戴夢夢挺着孕肚出席。

ZEN連唱3首勁歌炸爆舞台，屏幕播出多張ZEN舊照及以前的訪問片。主音黃和興先跟大家打招呼，「大家好，我哋係ZEN！」續稱：「人生就像列車向前行，喺我哋嘅音樂人生裏面，有好多人喺我哋生命中出現過，有人上車有人落車，仲有一班人同我一齊行，與其成日諗住自己幾時落車，不如好好享受吓我哋呢班車，望吓出面嘅風景。」他說當年4子好天真去參加音樂比賽，無想過會攞獎，也無諗過會有公司會簽他們，感謝當年發掘他們的郭小霖：「呢個音樂旅程唔容易，都行咗30年，大家仲身體健康。」他又引用黃家駒曾經講過「沒有樂壇只有娛樂圈。」這句說話，指ZEN好辛苦用了好多力氣，用了30年時間才行到屬於自己的舞台。

現場重溫ZEN出道時奪得「叱咤樂壇新力軍」金獎的片段，黃和興講笑：「有冇留意腮骨？我哋進化係有進步無退步。」今次演唱會成員都落力減肥，阿鴻就瘦了6kg，阿興爆出原來一直唱錯《沒有去的旅行》的歌詞，將「留在這裏鬱鬱過此生」的「鬱鬱」唱成「憂憂」，要向填詞的黃偉文道歉。鼓手阿琛演唱solo《舊地》改為彈結他，台下原本做觀眾的Nice上台代為打鼓。

今次能夠圓夢開騷，他們多次感謝歌迷和家人，阿鴻搞笑說：「講多謝，講到好似當自己結婚。」阿輝打蛇隨棍上：「不如順便宣布結婚？」阿鴻即說：「未住！」到Encore環節，阿興突然出現在場館後排，與觀眾近距離演唱經典歌《I Remember You》，惹來尖叫起哄，之後阿興帶頭多謝成員的太太們，因為無太太就沒有這個演唱，然後又再次向阿鴻催婚，阿鴻終鬆口：「下年派利是啦！」第二度Encore時，台下有人再點唱《I Remember You》，阿興說過因外母就坐在台下，所以不敢爆粗，但轉頭他就錯口爆粗，笑罵「X！你係咪聾㗎？唱咗啦！」

騷後阿興表示本身較易喊，不過今次開騷是興奮多於傷感，所以沒有喊，他們催婚差點搞喊阿鴻？阿鴻表示看到台下好多朋友和粉絲，非常感動，要忍住淚水。問阿鴻是否下年結婚？他說：「真係得㗎！今日所有親戚朋友，成個家族嚟晒，好誇張，當自己結咗婚，以前真係少睇我哋出騷，好愧疚！」阿輝直言以前做雜錦騷多，不好意思邀請親戚捧場。今次能夠順利完成樂隊首個演唱會，最大功勞是黃和興，阿興表示：「幫大家圓夢，亦幫所有粉絲圓夢，正如台上講，我希望呢件事大家記好耐好耐。開屬於ZEN的演唱會真係比較難，犧牲咗瞓覺和陪家人的時間，我都好多謝自己，4個瞓身去做呢個騷。（多謝老婆？）老婆講咗7、8年，25周年都講過，時間未夾到。」歌迷希望他們下年再開，表示會儘力夾時間，講笑:「夾時間都夾咗30年，勁過哈雷彗星。」至於會否考慮重組樂隊?直言重組約食飯都很難，阿興表示雖然周一（25日）便返馬來西亞，其實有工作便會返港，又指現在做歌很方便，讚阿琛做歌愈來愈叻，阿鴻直認將會再出新歌。

東網網站 : https://on.cc/東網Facebook專頁 : https://www.facebook.com/onccnews/