偷偷記得｜梁祖堯構思全新劇本 岑寧兒首演舞台劇 演Mean爆護士長

由風車草劇團主辦的《偷偷記得》絮語音樂劇場，將於11月28日起假葵青劇院演藝廳舉行。風車草劇團三大台柱：梁祖堯、湯駿業及邵美君，將聯同首度參與舞台劇演出的岑寧兒（Yoyo），上演一場都市內發生的揪心故事。

風車草劇團在暑假演出瘋狂喜劇《Di-Dar》後，《偷偷記得》則以感性行先。編劇兼主演的阿祖介紹：「今次要創作純感性嘅故事，裏面有好多音樂，因為劇中角色喺日常生活中，好難講出自己感受，但最好用音樂去講的呢啲嘢，既然要唱歌，我哋就搵咗Yoyo，我諗呢次會係療癒旅程，希望呢部戲畀到大家勇氣同埋動力，就係好好諗番好好嘅嘢，偷偷地記住美好嘅嘢，然後繼續向前行，儘管唔知第時係點，或者第時會更加差﹑還是點都好，但喺呢一刻都有勇氣行落去。」

Yoyo今次首度參與舞台劇演出，就要飾演鐵嘴護士長，但不講不知，原來Yoyo求學時期是辯論隊成員，阿祖笑言：「我諗全香港唔係好多人知道有把鐵咀喺你內心深處，辯論隊喎！我聽到嗰陣時係Wow咗一聲！但出嚟見多幾次就發覺，係㗎，明㗎！」Yoyo首度參與舞台劇便挑戰高難度角色，但她笑言：「讀書參加過辯論隊之後，都冇乜機會可以盡情咁mean出嚟，呢個係我好期待做嘅事。我都好多謝你哋畀我參與同埋咁信任我，我都好信任你哋，今次應該好好玩。」

在創作《偷偷記得》之前，身為監製的Ahdee與編劇阿祖曾討論，身處現今社會的我們，需要什麼類型的舞台劇，然後他們想到要製作可以療愈的舞台劇，跟觀眾療癒一些不敢再觸及傷痛，或者難以痊癒傷口，當想起一把療癒的聲音，即時便想到Yoyo，別無他選。

從未演過舞台劇的Yoyo，為何又會答應演出呢？Yoyo表示：「我都鍾意睇舞台劇，中學都有上過戲劇堂，主要因為今次有音樂部分，如果唔係有唱歌部分，我未必有把握挑戰，相信大家一齊可以做到好嘅表演。」

早前眾人已開始埋首圍讀，Ahdee對於Yoyo演繹也讚不絕口，道：「阿祖為Yoyo度身訂做，睇準佢嘅特質去寫個故仔，當Yoyo一開聲試讀，我哋都覺得『有啊！』，佢嗰種感覺，係大家平時好少見到佢嗰面：有喜感，鐵嘴得嚟又貼到心。」阿祖亦認同：「如果係第二個做呢，你會覺得好乞人憎，但Yoyo做呢，你唔會憎呢個人。」

為配合宣傳，阿祖、Ahdee、阿君及Yoyo日前拍攝宣傳海報，眾人站在花叢之中，充滿美態，Ahdee為大家介紹這次海報概念，說：「花叢裏面其實有個手環，會令人想像到呢個係地鐵車廂。《偷偷記得》成個故事發生喺鐵路中轉站入面，所以見到我哋設計咗荒廢鐵路嘅感覺。」

眾人身上穿上彷如制服的裝束，其中阿君要穿上斗零踭，向來愛以輕鬆打扮示人的阿君，近期頻頻穿斗零踭演出，但她表示：「斗零踭的確令我成個人線條靚好多，佢哋未必係想挑戰我嘅能耐，佢哋好惜我㗎，𠵱家好習慣㗎喇！已經可以著住斗零踭打籃球。」

（即時娛樂）