楊千嬅被丁子高投訴「衰聲」 回顧入行30年感受：忠於自己

楊千嬅日前接受新城程凱欣主持的《原來生活好快樂》訪問，剛巧與千嬅推出的新歌《Live MY Life》概念吻合。千嬅回顧過去30年人生，大談與老公丁子高相處之道。

千嬅透露完成巡迴演唱會，在農曆新年前已開始休息，她說：「適逢今年30周年，歌迷成日問幾時出新歌，自己又準備好唱咩歌，過去2年巡迴一路都有做音樂，新歌做咗3、4隻，中間又做緊翻唱黑膠碟項目，𠵱家開始做新歌宣傳。」

暑假期間，千嬅與丁子高和兒子丁進諾（Torres）旅遊，連串工作稍為延遲，她說：「咁啱個仔放暑假，之前佢同爸爸去咗summer camp，畀佢哋相處下，我就Join最尾嗰程，玩咗1星期，返嚟就開始做宣傳。」有傳千嬅申請紅館舉行演唱會，她大賣關子：「8月會有細節公布，自己都等咗好耐，有機會就做，最緊要自己準備好。」

千嬅入行30年，回顧過去經歷人生不同階段，千嬅形容是沉澱，她稱：「人一出生就係修煉，你會遇到唔同起伏，呢啲起伏係會不停重複，當呢啲起伏再重複時，睇你係用咩心態，每次應該係層層遞進，每個起伏係愈來愈大，因為你有一個人生高度，歲月同呢個世界去量度嘅時候，一路係加數，我學緊係減數，而減數嗰樣嘢唔係你能力不逮，又或者你內心軟弱咗，而係因為你個人嘅內核，有成長或者強大嘅時候，你先覺得有啲事情，唔需要執著，應該專注自己想做嘅事，甚至忠於自己感受，去將自己擅長嘅發揮到最好。」

千嬅與丁子高是「姊弟戀」，2人結婚16年，恩愛非常；問到相處之道，千嬅直言雙方性格要合得來，她說：「婚姻並唔係你最愛或激情時候結婚，而係激情過後，對方仍然可以相處，我覺得我都搵到一個好嘅對手去相處。」

千嬅指婚姻是唯一一次選擇自己的家人，所以相處的重量比較重要：「當然我哋唔係話結婚好耐，但係有經歷嘅，首先思維同步，我比佢大啲，所以成熟快，某啲事我睇得好開，有啲事可能唔係咁，中間會有啲卡住，但要有耐性接收大家嘅差距，又願意去等待大家嘅節奏，呢個就要經營。」

兩公婆有爭執時，是否平心靜氣討論？千嬅直言：「我哋姊弟戀嘅好處係，我比較冷靜，唔會發癲，但最慘係我把聲好男仔，冇乜語氣，佢（丁子高）𠵱家都會投訴我講嘢衰聲，但我唔係有任何情緒。」

（即時娛樂）