《殺神Nobody 2》殺神帶家人度假意外惹奸黨　樂園變戰場

由《殺神John Wick》編劇Derek Kolstad開創的《殺神Nobody》以小人物被欺壓，但原來是隱世高手逆襲打臉的公式，受到一片好評。現在迎來續集，今次講述Bob Odenkirk飾演的前政府殺手被逼重出江湖後，因要還債密密接job，冷落家人。為修補關係，他決定休假帶老婆仔女與老竇，到自己小時候去過的主題樂園度假村放鬆。怎料機緣巧合下，他惹到由莎朗史東（Sharon Stone）飾演的殺人狂奸黨大家姐，家人陷入危機，他必須利用主題樂園地形，與奸黨打以小敵眾的遊擊戰。

Bob受訪時透露，今次請到莎朗加盟，原來與他主演的電視劇《絕命律師》（Better Call Saul）有關：「做娛圈有個好處係你會喺唔同活動遇到唔同人，我就喺《金球獎》遇到沙朗，佢讚我喺《絕命律師》嘅演出，令我好感動。我都好鍾意佢演戲，佢好犀利……當我哋思考大奸角時，就諗起莎朗史東，唔知佢會唔會考慮呢？我就寫咗封信畀佢，話呢套係類型片，同埋如果佢想嘅話，肯去到好盡咁演。好多演員係要演到好含蓄，愈含蓄愈好，好多灰色地帶，好多層次，我就話，唔好有層次，OK？我要純粹壞人，邪惡。佢就話，我明，我可以做。我都唔敢相信佢會應承。之後當然，佢嚟到片場已經準備好大玩一場。」

東網網站 : https://on.cc/東網Facebook專頁 : https://www.facebook.com/onccnews/