風車草《Di-Dar》載譽重演頭場謝幕盡見友愛　黃秋生演上癮望上紅館

《風車草黑心喜劇Di-Dar (Comeback)》載譽重演，昨晚（17日）舉行頭場演出，劇中一眾演員梁祖堯、湯駿業（Ahdee）、邵美君（阿君）、黃秋生、梁業（肥仔@ERROR）及何洛瑤（Sica）傾力演出，令全場笑聲不絕。謝幕時，眾人分享了這次合作的感受，黃秋生演上癮望上紅館，梁祖堯更為胡麗英病癒重返舞台哽咽。

謝幕時，台下觀眾掌聲如雷，秋生即開心表示：「我見到你哋咁熱情，我突然有個諗法，假設如果重做去麥花臣好嗎？抑或紅館呀？」觀眾聽到秋生的提議，也興奮得瘋狂尖叫，歡呼聲此起彼落，秋生隨即續道：「我做咁耐舞台劇，我未試過做一個戲咁開心，咁熱鬧嘅！多謝大家！」

不少人初次見到秋生都會好驚，今次劇中年紀最小的Sica、鄧家杰（Kakit）及杜曦駿（Larry），事前還問梁祖堯對方的氣場是否十分強勁，不過阿祖台上大爆，在相處過後，秋生與眾人打成一片，而且更成為整個《Di-Dar》團隊的御用軍醫，既為邵美君按摩鬆腰，又拎私伙跌打酒為肥仔捽腳，眾人都十分感激秋生。

至於感性的梁祖堯，在台上介紹劇中演員、好同學兼好朋友胡麗英時，他忽然哽咽起來，他解釋道：「上一次《Di-Dar》演到中途嘅時候，佢身體出現咗一啲狀況唔能夠演晒咁多場，今次好開心佢返嚟同我哋一齊演戲。」原來阿祖流下的是充滿喜悅的淚水。