裕美爆真相　轟麥明詩：「你想攞流量唔好講大話」

「十優港姐」麥明詩今年3月與老公盛勁為正式成為人父人母，早前佢因為同前度林作母親王莉妮見面後，被對方唔覺意晒出BB正面相而引發爭議，林作現任女友裕美直斥麥明詩為整件事的「始作俑者」，踢爆佢生B後游說林母跟BB上契，尋日（19日）麥明詩指自己同伯母關係好好，今次佢「中人圈套」，矛頭直指裕美。

對於麥明詩昨日指自己「中計」，裕美今日接受東網訪問時，坦言：「佢話佢中計，即係有人設咗圈套啦！咁邊個設圈套呢？我？我設嚟做乜？我上唔到新聞㗎喎！我亦都唔需要，第二係唔通林作媽媽要設個局去做新聞咩？佢唔係靠流量搵食㗎喎！佢唔需要喎！唔通林作設圈套？佢周圍抽水，佢幾時需要搵佢嚟抽呢？」

裕美又爆料，指事件發生個多月前，林作媽媽每次食飯，都指麥明詩個仔想認佢做契媽，裕美說：「林作媽媽話佢叫咗好多次，都唔知點樣推佢，所以林作媽媽先出去見吓佢啦！呢個係我咁耐聽到嘅事情。其實唔關我事嘅嘢我都唔會理，但既然新聞出嚟講到林作媽媽好似唔啱咁，咁我知道個事實呀嘛，咪講番個事實出嚟囉！我唔得閒編寫故事，因為編寫故事係要時間，我係一個冇耐性去浪費時間嘅人嚟！講大話係要時間諗故事、諗人設嘅！」

再問到裕美現時麥明詩叫林作媽媽認她兒子做契仔，可有覺得對方不尊重她，甚至向她挑機時，她謂：「我唔需要人哋尊重我嘅，我只係需要人哋唔好搞我！因為我啲時間好寶貴，我係全家人嘅經濟支柱，我仲好希望救到啲小動物，呢啲全部都係要時間同金錢，睇醫生、各樣都係要錢嘅，冇錢係解決唔到問題嘅，但係你冇啦啦講到我個人時，我唔出嚟回你一句都唔得，因為你煩到我呀嘛！你想攞流量，你唔好去講大話，你可以努力做工作，用番啲正常方法去做嘢係冇問題嘅，好多時唔一定係要吓吓上新聞先帶到收入畀妳，上新聞係帶唔到收入畀你嘅。」

問到裕美是否跟林作媽媽關係好才出聲幫她，還是她為正義挺身而出時，裕美表示因為自己知道個事實，指老人家都幾慘：「佢明明都唔想出去，咁人哋叫咗咁多次咪出一次囉！件事都唔關我事，林作同乜嘢人一齊，佢媽媽同乜嘢人交往，都同我無關，每個人都有自己生活圈子，但要搞到人哋麻煩就唔好囉！你要咁多人幫你一個做新聞，但你冇同我哋講㗎嘛，最後你話自己中圈套呢句說話係咪傻咗呢？」

再問她如果有機會見到麥明詩會否尷尬時，她謂：「其實我本身唔識佢，只係工作見過，嗰陣喺TVB，我仲未識林作，我唔會覺得尷尬喎！尷尬嗰個應該係佢啦 ！我都係講事實啫！」稍後，裕美亦轉載昨日麥明詩「中圈套」新聞，留言繼續轟：「賊喊捉賊」

本身對事件默不作聲嘅林作，眼見兩任女友罵戰逐步升級，林作即拍片撐裕美：「裕美係我見過最善良嘅人，裕美係唔會講大話，依家究竟係邊個陷害邊個，邊個搞到邊個，我覺得是大家自有公允。即係呢唔好睇出面大家點樣，每個人都是有自己嘅事業，有自己嘅生意，大家都好忙，唔得閒喺度搞呢搞路，究竟係邊個搞呢搞路？我覺得大家自有分明，重點呢度有一個重要嘅warning（警告），唔好搞到我女人，我一定出嚟為佢出頭。」未有上鏡裕美附和：「唔好阻住我做嘢，就係咁簡單，你哋鍾意搞新聞就自己搞晒佢，唔好煩到我，我唔需要搞新聞嚟搵生意，OK，好cheap。」

東網網站 : https://on.cc/東網Facebook專頁 : https://www.facebook.com/onccnews/