娛圈單打︱被追問即起晒弶　姊弟戀極速玩完

38歲嘅菊梓喬，去年驚爆戀上細4歲嘅保錡，美女與野獸組合令人震驚。二人都擺出認真態度，Hana每被追問感情狀況，總係一臉甜絲絲，仲被網民拍下二人勾肩搭背夜遊九龍城一幕，粉絲只好送上祝福。殊不知，呢段姊弟戀似乎一年貨仔已經玩完，有冇再兒戲啲呀！

嗱，保錡自從今個新年向阿叻拜年後，喺網上掀起一片怒潮，網民問佢有冇良知，仲搞到脫粉添，認真誇張。自此保錡好似冇面見人咁款，未有現身公開活動。Hana身為緋聞女友，日前出席拍攝工作，自然畀人問起保錡近況。

豈料Hana一反常態，竟然起晒弶、落晒閘咁款，冷冷表示唔好問佢，問番保錡，似乎要劃清界線。記者進一步追問係咪單身，佢只話要專注工作，對下一段感情冇期待喎！吓，講到咁，唔通已經玩完？

有冇再快手啲呀？戀情舊年暑假左右傳出，至今剛好一年，都算短命咯。咁當然，呢段情一直頗有爭議，一來女方粉絲唔多接受，二來男方被轟政治變色，由黃轉藍，都係拜呢位女友所賜。呢一年嚟保錡冇乜嘢撈，只能寄情跑步；而Hana轉會後亦唔見得有突破性發展，一味行行企企。會唔會因此將戀情保密，專心事業，真係要睇過至知。

之不過，Hana年紀一把咯，事業上高不成低不就，感情上又冇咩着落，講起都幾可惜。既然連一手捧紅自己嘅TVB都毫無留戀地離開，咁真係要加把勁唱好啲歌、做出成績來，咪畀前東家睇死啦！溝仔當然冇問題，但由吳唱K Downgrade到吳保錡，咁就好似有啲濫囉。

東網網站 : https://on.cc/東網Facebook專頁 : https://www.facebook.com/onccnews/