林溥來演變態殺手　花兩個月激減15磅

無綫劇集《麻雀樂團》故事輕鬆又有人情味，大受觀眾歡迎，不過，在昨晚（14日）播出一集中突然殺出的變態連環殺手為劇情迎來張力，是次飾演變態殺手的是林溥來（Patrick Sir），談到首演變態殺人狂，Patrick Sir事前做足準備功夫，他為突顯角色帶點偏執的性格，刻意花了兩個月時間激減15磅，他接受官方訪問時說：「我係特登令自己睇落偏瘦少少，希望望落去書呆子啲同偏執啲，個髮型同眼鏡都係想突出個木納同陰沉感。」他指由於角色有所難度及挑戰性，故在片場亦不敢像平時般與其他人傾偈：「今次我主要自己坐埋一邊、冇同人傾偈，靜靜地令自己進入個角色。望人都唔係正面望而係背後望，練習下啲眼神，呢樣嘢都幾幫到自己演繹。」Patrick Sir今次還首度挑戰動作場面，先後跟黃庭鋒與譚俊彥上演連場激戰。談到與庭鋒的後巷肉搏戲，Patrick Sir笑言兩人打到半死：「拍嘅時候好熱，所以都辛苦，我喺呢度劇都算做咗好多之前做唔到嘅嘢。好彩我哋本身都係運動底，庭鋒踢波、我就打籃球，總括而言，今次係打得好爽、跑得好甘！」

除了一眾主角演出亮眼，其他配角亦相當好戲，其中新人廖家爵（Kelvin）在劇中飾演譚俊彥（Shaun）年青版，有網民更直指Kelvin無論神態與動作和Shaun十分相似。談到角色，Kelvin接受官方訪問時，透露起初接到角色時，因監製及導演一句「你真人同角色有啲接近」，令他因為不懂得如何將自己釋放出來而一直想不到好的演繹方法：「嗰度Kick咗好耐，我諗咗好多方法點樣令自己放鬆同接近個角色，最後一開工嗰種因為Kick得滯，我就諗到請教何遠東。佢幫我諗到不如試吓當呢個係《扮嘢王》，我係模仿阿Shaun嘅，嗰吓我即刻叮一聲。」因為何遠東一句提點，Kelvin不但喪煲Shaun主演的《企業強人》，還盡量留意阿Shaun平時的談吐及小動作，幫助自己潛移默化。

談到與阿Shaun合作，Kelvin坦言十分十分感謝對方的陪伴及打氣：「佢真係幫咗我好多，主要係佢嘅陪伴。因為我嗰時屋企發生咗啲事，要一路拍劇一路處理家事，個人比較Down啲，好彩開工時阿Shaun一路陪住我，同埋成日叫我放鬆啲。我記得拍最後一場戲時，佢廠景我外景，佢一完咗自己嘅拍攝，仲特登去我外景度陪我拍埋最後幾場戲，我真係好多謝佢，咁樣陪住我呢段時間。」

東網網站 : https://on.cc/東網Facebook專頁 : https://www.facebook.com/onccnews/