黃宗澤蔡潔「菠菜CP」形象入屋　溫馨床戲惹熱議

藝人黃宗澤與蔡潔第8度合作拍劇，在邵氏劇集《執法者們》中終於修成正果演夫妻，觀眾相當受樂封他們為「菠菜CP」，劇中有不少溫馨場口，包括昨晚（8日）播出和好如初後的溫馨床戲，黃宗澤攬着皮膚雪白的蔡潔，畫面唯美，他更溫柔地親吻對方頭頂，相當溫馨。網民指難怪這一對傳緋聞：「蔡潔嗲Bosco勁正。」

Bosco與蔡潔這一對演出愈演愈有feel，她接受訪問時直言Bosco是學習目標，更大讚對方好得人鍾意：「我拍第一套劇已認識佢，當時佢隻腳受咗傷，而我有好多場口要同佢一齊完成，嗰刻我真係見到佢好專業，佢會忍住身體上嘅不適、去完成好多不可能任務。而且佢好得人鍾意，劇組上上下下都好喜歡佢，因為佢對人好真誠，我都成日提醒自己要向佢學習。其實我哋每次再碰面，都會希望自己做得比上次好，無論係個人嘅演出、或者係大家嘅互動，佢都激勵到我進步。」

蔡潔又笑言黃宗澤是她的「定心丸」，有他在身邊相當放心：「好榮幸入咗公司呢六、七年，可以同Bosco合作咁多次、成為好好嘅朋友。其實嗰時我拍《法證V》啱啱擔正，係好緊張嘅，所以當身邊嘅拍檔係好朋友時，個緊張情緒會有紓緩；我好多嘢都會問佢意見，如果佢肯定我，我係會定好多，都好感恩喺自己成長路常常都遇到佢，令我踏實好多。」

她今次在劇中談情說愛外，動作場面亦另人眼前一亮，但她直言並不容易，更扭親手指公：「雖然拍出嚟只係幾秒，但對我嚟講係並不容易，但我都係開心嘅，因為嗰兩場動作戲，可以show到我角色工作時嘅專業、表達到現代女性喺工作上嘅專業態度。同埋好多謝武指同所有工作人員，因為佢哋教識我點去擺靚啲甫。我想講，雖然係咁簡單嘅打戲，但我都係扭親咗少少手指公。」她又親解險遭車撞的場口，表情相當逼真，蔡潔笑言場口中的驚訝樣是真反應：「我個驚訝樣係真架，但好彩Bosco好有經驗、知道點樣做出嚟會有動感啲，而我只需要做番驚訝樣同埋跑得夠快就ok。」

東網網站 : https://on.cc/東網Facebook專頁 : https://www.facebook.com/onccnews/