黑雨｜楊卓娜徒步回家險被冲跌 到機場驚覺漏帶護照：畀人教訓10分鐘

黑色暴雨警告信號會至少維持至今天（5日）下午五時。楊卓娜今午在社交平台發長文稱「可惡嘅黑雨」，又指「疲於奔命的12小時」。

楊卓娜表示凌晨2點半左右，黑雨浸到車位前的馬路，好似黃河：「車返唔到屋企，我只能停泊一邊，徒步回家，爭啲俾水冲跌！突然醒起未拎Passport，隨手拎起放入手袋，梳洗完諗住爭取時間去休息，結果行雷閃電雨聲，令我擔心咗一晚，又擔心早上都移唔到車返車位，又擔心早上水浸太深未退，離開唔到屋企去機場，結果成晚都冇瞓！」

到早上她終於叫到車前往機場，但去到機場Check-in時才驚覺，護照竟不在Passport holder入邊，她寫道：「呢一刻真係『OMG』，『如雷灌頂』，呆咗！俾人教訓咗10分鐘，終於成功教工人姐姐搵到我個Passport，諗住過到關，但係又call唔到車，最後終於得到好鄰居嘅幫助，送姐姐和passport來機場。」

惟此時路上水浸，全部車死火：「天啊，旅行先嚟黑雨，仲要十萬火急撞正黑雨，寸步難行。等咗1小時，我嘅英勇鄰居，為咗唔好再喺路上遇上更多嘅水浸，更多嘅延誤，終於決定將姐姐車到去地鐵站，我聰明又善良嘅姐姐，最後幾經辛苦再用咗一個半小時，終於將我嘅Passport送到我手上！飛機當然就搭唔到啦，唯有轉下一班！」

楊卓娜感激航空公司的地勤同事：「佢哋知道我嘅困難之後，畀咗好多建議，而且好快幫我確定下一班嘅機位，令六神無主嘅我好快可以安定落嚟！」

她寫道：「雖然我要拜拜楊生同豹豹佢哋條尾，但係無端端賺咗幾個鐘頭me time，可以好好行吓街，喺機場食個靚lunch，上機之後就可以好好補眠尋晚欠咗嘅美容覺！經一事長一智，下次真係要小心啲，拎咗Passport Holder，唔等於拎咗Passport㗎！反省完畢，繼續食嘢！」

（即時娛樂）