m18講場：多名前高層聚集港交所　所為何事？

周五(20日)香港金融大會堂非常熱鬧，多位前高層「回巢」，到底發生甚麼事？原來係齊齊慶祝香港交易所(00388)成立25周年，難怪咁人齊啦！

數數人頭先，出席嘅有：於2006年至2012年任主席的夏佳理、2012年至2018年期間主席周松崗、任期2018至2024年的史美倫；2010年至2020年的掌舵人李小加、2021年至2024期間擔任行政總裁歐冠昇(Nicolas Aguzin)。等等先，點解重組後首席主席李業廣無影？因為去咗旅行啊！3位前主席及現任主席唐家成喺台上接受行政總裁陳翊庭訪問，大講在任期時嘅心路歷程、展望未來。

另外，香港證監會前主席梁定邦、方正、雷添良亦有現身。當然唔少得證券業界嘅靈魂人物，包括前立法會金融服務界議員張華峰、香港證券學會會長李細燕等，真係濟濟一堂。

會上亦有中樂鼓演奏、合唱團演唱，鼓聲激昂，歌聲動人，但絲絲覺得最好聽嘅都係鑼聲，因為有鑼聲，就有新上市或喜慶事。話說港交所25周年誌慶活動之一「金鑼巡禮」，周五已經開始咗，金鑼會去足9個地方，大家想同個鑼打卡，要把握機會啦。

靜靜雞話你知！「金鑼巡禮」除咗今、明(21日)兩日喺中環海濱長廊香港摩天輪出現，稍後時間將會分別「現身」西九文化區、鰂魚涌、沙田、將軍澳、灣仔、啟德體育園、葵涌和尖沙咀。

東網網站 : https://on.cc/東網Facebook專頁 : https://www.facebook.com/onccnews/