姜濤墮海被質疑笑罵由人　為花姐「我最喜愛」等於冇實力解畫

男團MIRROR人氣王姜濤今日（13日）現身星光大道出席籃球活動，吸引近千姜糖（姜濤粉絲暱稱）到場支持，姜濤現身一刻隨即引來全場尖叫歡呼，場面墟冚。活動上一身黑色長袖打扮的他，大玩籃球遊戲騷球技，雖然頂着猛烈太陽，熱得他不時要擰轉身以紙巾抹汗及飲水，但依然全程保持笑容，相當專業。

姜濤受訪時被問到大熱天出席戶外活動會否太辛苦？他笑指相比下大雨，大熱天相對還好，又分享自己消暑心得，自己會多飲常溫水，並建議大家盡量不要飲冰水：「天氣忽冷忽熱，加上出入冷氣地方，會令到腸唔好，溫水符合身體溫度。」他指必要時會噴消暑噴霧降溫，亦笑指自己「夏天怕熱、冬天怕凍」因此不會以游泳消暑。

談到他早前因頭痛要服藥，他表示現已痊愈，至於因墮海事件導致手腳擦損而留下疤痕，他直言「男仔有啲疤冇乜所謂」，故不用做去疤療程，對於藝人盧覓雪在發生墮海事件後，於節目中批評他「情緒冇問題，智商應該有啲問題」，姜濤坦言沒留意太多：「公司叫我盡量唔好上網睇，驚影響我心情，所以我都冇乜太過留意，所有評論一定有佢嘅主觀性，不過我哋都會用一個客觀心態去睇自己。」他坦言跟對方不熟，有機會也想跟前輩認識，對於質疑他墮海的言論，他指作為公眾人物有會很多被猜測和質疑的地方，故覺得合理，問他有否覺得委屈？他笑謂：「過咗嗰個年紀，唔會有咩委屈。（依家心理質素好好？）時間浸出嚟。」談到事發後獲毛舜筠以短訊慰問，他先感謝對方，亦透露還有很多前輩也關心自己，很感激大家：「因為呢件事，我都睇到身邊有好多人真係好關心我，所以我覺得係好事嚟嘅。」

談到經理人花姐早前指獲「我最喜愛」獎項等於沒有實力，但因姜濤與MIRROR過往亦曾獲得過多次「我最喜愛」獎項，故惹來鏡粉不滿，怒指花姐踩自己公司的藝人，姜濤表示要替對方澄清，指MIRORR成員都知道花姐是為他們好：「佢講嗰番說話係中間剪咗出嚟，可能有啲前文後語，代表佢唔係真係咁樣嘅意思，因為佢嘅初心都係為我哋好。（斷章取義？）我未睇過完整片段，但花姐都有特登搵我解釋佢真係唔係咁嘅意思，話佢從來都冇諗乜嘢特別意思。」對於言論引起大家不滿，他笑謂：「小心啲喇咁樣！其實我最擔心係佢，佢因為照顧我哋都遭受好多言論，所以我哋都希望呢件事快啲完，其實係一件好小嘅事。（花姐口頭禪？成日叫你哋小心啲？）過咗畀佢話嘅年紀，依家係提點。」

另談到隊友Anson Lo早前跟隊友吃飯慶生日，但姜濤沒有出席，他解釋當日因要綵排及自己也有要事忙因此缺席：「我都好想去，私底下有同佢講生日快樂，有送生日蛋糕。」談到對方在他墮海後，貼出站在海邊的照片惹來熱議，姜濤直言是巧合：「了解佢嘅人都會知道佢鍾意喺海邊影相，無論係呢件事之前定之後，呢個係佢嘅生活，所以我哋唔可以用呢啲嘢去質疑人哋。（有冇唔開心或者介意？）冇，過咗嗰個介意嘅年紀，我依家係所有嘢都接受同埋睇開咗好多嘅年紀，唔係心理係心靈上。」

東網網站 : https://on.cc/東網Facebook專頁 : https://www.facebook.com/onccnews/