江若琳東莞巡唱　歌迷捱通宵背歌詞

去年回歸樂壇的歌手江若琳（Elanne）相隔8年再踏香港舞台，將於8月24日假麥花臣場館舉行演唱會，近日為個唱積極綵排的她，不忘返內地跟歌迷見面。日前於東莞舉行第三站巡唱，分別以黑、白造型現身的她大唱出道以來的歌曲，現場氣氛熾熱，她一度踎在台邊，邊唱邊和歌迷握手，而「生煎包王」老公Oscar則在後台做「阿四」，為愛妻打氣之餘，又忙做攝影師為Elanne影靚相。

Elanne接受訪問時表示東莞巡唱相當難忘又感動，因為有歌迷為支持她而捱通宵：「場騷令我好多情緒，咁多年冇唱歌，但由第二首歌開始，直至最後一首歌，佢哋全部都識得唱，有啲新面孔嘅粉絲同我講，為咗同我一齊合唱，佢哋做晒功課，睇騷前一晚成晚冇瞓去背歌詞，仲聽晒我啲歌。」

由於懷念大合唱的氣氛，她期待前來捧香港場的歌迷屆時「唔好怕醜，一齊高歌」，並集氣謂：「呢個係我小小嘅心願，今次麥花臣只開一場，啲粉絲話我啲歌係佢哋嘅童年回憶，歌單全部都係大家細個時好熟悉嘅歌曲。」她又謂非常享受站在舞台時的夢幻感覺，因為曾經以為不能再當歌手，不過既然得上天眷顧又受歌迷歡迎，故許下會繼續唱下去的承諾：「我視香港為我嘅基地，但都想去唔同地方唱歌畀大家聽。」

東網網站 : https://on.cc/東網Facebook專頁 : https://www.facebook.com/onccnews/