娛圈單打︱打靶打得好　好行夾唔送

近年中國內地已鮮有對罪犯判處死刑，因為世界潮流講人權，偉大嘅祖國當然亦要趕上。之不過，有啲人渣，唔判死刑實在難洩心頭之恨。31歲內地男藝人張藝洋，用刀殺死未成年女友，之後仲試圖製造女友自殺假象，冷血兼變態。紙包唔住火，條打靶仔最終被判死刑，已於去年12月執行槍決，大快人心！

抵死，真係抵死！案發於2022年，條打靶仔以慶祝生日為由，將同村16歲張姓女友，誘騙至陝西興平市某樹林，期間因為分手問題，二人激烈爭執，男方用刀割女友頸項，令女友窒息死亡，手段極度兇殘。案情仲揭露，有人長期以自殺脅迫女友維持關係，控制欲極強，心理狀態偏執。當局以「故意殺人罪」將張藝洋判處死刑，成為內地娛圈第一人！

講真，31歲溝個16歲，點睇都唔正常啦，家陣為民除害，總算還女方家人一個公道。至於呢位張藝洋，冇呢單嘢發生，相信都冇乜人識。內地網民形容佢係「十八線演員」，茄喱啡都談唔上，一死成名，都算益咗佢。

話時話，近年內地嚴打劣迹藝人，幾紅都冇得翻身。范冰冰被指逃稅都算小兒科，另一女星鄭爽唔止逃稅，仲發生「代孕棄養」風波，沒有最澩嫪，只有更澩嫪。仲有紅極一時嘅吳亦凡，被判強姦、聚眾淫亂罪成，判監13年，附加驅逐出境。即使大少爺上訴，一樣維持原判冇情講。

都啱嘅，明星賺錢賺到盆滿缽滿，豬籠入水，即使唔要求你做道德L，最起碼都要維持番個形象吖。偏偏有啲明星得寸進尺，不知收斂，甚至做埋啲傷天害理嘅事，梗係要被嚴刑追究啦。

東網網站 : https://on.cc/東網Facebook專頁 : https://www.facebook.com/onccnews/