柯煒林開直播剖白抗癌心情︰好好向前行 接受有可能輸

現年33歲的柯煒林（Will）前天（7月30日）在社交平台自揭患上肺腺癌第四期，目前正在接受標靶藥治療。Will宣布患病後，昨晚首度於社交平台開直播，吸引近4000多人收看。鏡頭前的他精神不錯，說話時不失幽默本色，更笑言︰「如果我要出歌，首歌叫《絕不擴散》﹗」

他又表示不願被稱呼為抗癌鬥士或勇士︰「我唔要做咩小鬥士，最憎做嗰啲咩勇士、鬥士。我淨係講我自己咋﹗我唔要呀！因為做勇士好似247要奮鬥咁，好似好攰咁﹗我最鍾意就係攤喺度唔郁，我做抗癌小廢青呀﹗」Will後來指「抗癌小廢青」這外號不夠響，想要一個有型兼厭世，但不失幽默的外號。當他看見有網民提議改名「抗癌Chill Guy」後興奮表示︰「『抗癌chill guy』唔錯，Cancer Chill﹗『癌柱』呀，我係『癌柱』﹗」

直播期間，Will偶爾咳嗽，他表示︰「咳冇咁犀利喇，我之前咳得好犀利。所以唔使擔心呀，因為行得走得，好精神﹗我成個身體除咗呢Part（肺部），都冇嘢，希望蜜月期唔好咁快過啦﹗」Will看見網民的留言，不時哈哈大笑。他說︰「我唔知未來係點，希望Keep住呢個態度面對身體變化。今晚多謝你哋，今晚好開心。唔使太擔心我，真係行得走得，唔係以前睇電視劇，一聽到之後就係咁樣。過去呢15年醫治癌症嘅方法多咗好多，所以唔好因為我而太憂心。」

Will又表示︰「我會努力去打贏佢，但要接受有可能輸，因為當我接受有可能輸嘅時候，我就冇嘢驚，剩低嘅就係好好咁向前行。」他又透露十分感恩自己有能力接受治療，因為不是每個病人也有此能力。Will說︰「感恩係醫生話我呢個Case可以食藥控制，唔需要做標靶藥以外嘅治療，所以仲可以如常生活。」

（即時娛樂）