郭柏妍胡敏芝巡遊谷新劇　無懼炎熱表現專業

無綫新劇《麻雀樂團》演員譚俊彥（Shaun)、姜大衛（John哥）、郭柏妍、胡敏芝等在灣仔出發先後到旺角、尖沙咀進行花車巡遊宣傳，期間更進行甩牌遊戲，劇中Shaun與姜大衛麻雀大鬥法，但譚俊彥笑指拍攝時要靠姜大衛指點打牌。

姜大衛的兒子姜卓文（細John）正參加無綫戀綜《女神配對計劃》，但被指瞞住力追的關嘉敏，與加拿大性感網紅Coco拍拖，問到姜大衛可有關心兒子的感情狀況？他說：「唔需要關心，佢咁大個仔，自己揀。不過，就有講過Coco，佢話喺網上識，佢嚟香港玩，陪佢周圍玩幾日，之後已經走咗，話只係朋友。」問到對劇中有合作的關嘉敏有甚麼印象？他讚關嘉敏是勤力、好爽朗的女仔。問到是否可以做新抱？他笑說：「睇吓佢點對我先啦，哈哈。」

姜大衛與譚俊彥爸爸狄龍多年不和傳聞再被舊事重提，他說：「都講過，因為大家做法、諗法唔一樣，所以冇乜往來都唔出奇，都幾十年，冇乜嘢，多謝大家關心。」譚俊彥指傳聞沒有影響他與姜大衛的合作，大家有緣分，也愈來愈多合作，問到可會安排爸爸與姜大衛食飯見面？他則笑謂要看緣分。

在酷熱下進行花車巡遊，認真辛苦，但郭柏妍與胡敏芝皆覺得不辛苦，但也忘記了搽防曬，立即曬黑了。郭柏妍最近除了劇集宣傳，也努力做運動跑步、行山鍛煉身體，但先落閘指一起做運動的是女仔朋友，沒有男士相伴。胡敏芝早前到歐洲旅行一個月，因早前拍攝綜藝節目後，希望自己能開眼界，坦言此行是與由大學開始拍拖7年的男朋友同行。問到旅行期間可有出現爭拗？她則笑說：「我哋一齊咗7年，要鬧嘅交都已經鬧咗，以前成日鬧交，依家就冇力去鬧，只係希望和平共處。」問到感情穩定可會結婚？她說：「暫時唔會，我都係25歲，仲好細個，努力事業先。」

東網網站 : https://on.cc/東網Facebook專頁 : https://www.facebook.com/onccnews/