靈魂約定|范麒智王智騫咀嘴兼曬肌 開拍前同居培養感情
憑男男CP成功突圍的型男王智騫(Martin)與范麒智(Kenji),擔演台灣BL劇《靈魂約定》男主角,劇集上周首播,已不乏出浴、裸露、親嘴戲等場面,好評如潮,令2人大叫驚訝。
《靈魂約定》改編自台灣原創小說《靈魂的約定》,講述靈魂交換,一個69歲老人靈魂穿越到20歲孫子身上,與室友共譜出一段命運錯綜交織特別情緣。
首次擔正的Martin和Kenji,劇集出街後心情勁緊張,Martin緊張到連夜失眠:「真係好緊張,因為都叫做人生第一套男主角,會擔心自己嘅演出未係最好,呢幾日有時瞓唔着。」
Kenji則說:「第一次拍BL劇,亦係第一次有咁多戲分,劇集出街勾起好多回憶,拍攝事前做咗好多準備,又香港台灣兩邊飛咁上堂,好期待出嚟效果;我都有將套劇分享畀身邊朋友及家人,雖然係BL題材,但個人認為劇情係老少咸宜。」
Martin和Kenji在劇中除了親熱戲外,更有牀戲及海量裸露鏡頭,2人笑言劇集尺度大膽,Kenji說:「尺度係好刺激,有一幕我哋嘅咀戲,咀到好似慾火焚身咁,一定會衝擊觀眾視覺,畫面上表達出唯美感覺,我幾鍾意呢一幕。」
拍攝期間,Martin和Kenji有不少親熱戲及肢體接觸,為投入角色,避免尷尬,2人開拍前已刻意同牀睡覺,Kenji說:「整個拍攝過程2個幾月,我同Martin同居,朝早起身到夜晚都見住,感覺好神奇。拍親熱戲亦冇尷尬,為咗好好磨合,我哋有幾日仲同牀瞓。」
Martin同Kenji除了在劇中大曬弗爆身型,還展示流利普通話,Martin說:「拍攝時間好趕,但我哋盡量比自己一個禮拜,有3日健身,有時真係淨係瞓得2﹑3個鐘,都要去健身室操嘢。普通話方面,好彩以前上過一啲普通話專業課程,喺普通話交流同埋咬字方面,都比較精準,但因為今次套劇拍攝時間比較趕,好多時候都唔夠瞓,有陣時攰到講嘢有懶音。」
Kenji就自言普通話麻麻,拍攝前花了很多時間背對白,Martin有普通話演戲經驗,教他用不同方法講得更暢順。
Martin跟Kenji亦為劇集合唱主題曲《換不了的你》及插曲《定格》,Kenji指:「超級開心,我好鍾意唱歌,中學仲試過去busking,第一次有實體作品,真係好期待。」Martin為了令聽眾能代入劇中虐心情感,自告奮勇以第一身角度為插曲填詞,為此更上特訓班,務求盡善盡美。
(即時娛樂)