林愷鈴首與母親拍劇勾兒時回憶 薛家燕拒玩交友程式

薛家燕、龔慈恩、林愷鈴（Ashley）近日接受澳門旅遊局邀請拍攝4集短劇，介紹澳門名勝及旅遊熱點。她們在劇中飾演三代同堂，戲內外同是母女關係的龔慈恩與Ashley第一次演對手戲稱感覺自然，Ashley更笑指過程十足拍攝紀錄片。

龔慈恩透露之前曾與女兒合作拍廣告，演戲則是第一次。被問到可擔心女兒有壓力時，她說：「要問個女先知。其實我好惜佢，惜個女多過自己，所以要求會不自覺高咗，但呢個年代可能唔咁適合，依家個女好成熟，係有能力嘅個體，所以有時我過分咗，都會同佢道歉。」龔慈恩在戲中是位嚴厲媽媽，現實中的她與女兒的關係更像朋友，因工作繁忙想有時間多加溝通，享受母女相處時光。

說到難忘場面，龔慈恩覺得澳門的動人景色及美食最難忘，更勾起她入行回憶。她說：「澳門係我由細玩到大嘅地方，好鍾意呢度，既有新玩意，亦有懷舊地方，感覺好舒服，同埋我拍劇、拍電影第一次做女主角，都係喺澳門拍攝，所以澳門對我嚟講特別有深厚感情。」提起跟家燕姐首度合作，龔慈恩難忘對方充滿正能量：「家燕姐嘅活力比大家都好，係一位好好嘅學習對象。記得家燕姐演嘅一場粵曲戲，見到佢光芒四射，好想跟佢學習！」

Ashley與媽媽鬥戲沒壓力：「平時我哋都好似朋友咁，鍾意發掘新地方飲咖啡同Shopping，所以拍攝過程好似拍紀錄片咁，拍得好開心。仲有，同媽媽出trip，生活上可以唔使帶腦，有媽咪照顧，所以有媽咪嘅小朋友真係好幸福，我好似變番小朋友咁。」說到拍攝難忘場面，Ashley透露一次在澳門拍攝期間下大雨，媽媽雨中拿着一袋二袋戰利品迎面跑來的一幕，令她勾起童年回憶。她表示：「有啲似平時佢去旅行，風雨不改、天不怕地不怕，玩到盡興嘅感覺，童年時，媽咪成日帶我哋周圍闖。」

家燕姐提到對澳門有種莫名的親切感：「以前拍《十月初五的月光》喺澳門取景，同張智霖、佘詩曼拍咗成個月，所以好多人以為我係土生土長澳門人。我都好喜歡澳門美食，三盞燈有東南小食、氹仔靚酒店中西餐都好值得去。」戲中家燕姐飾演愛玩交友app的新潮嫲嫲，問到現實中可有玩過？家燕姐表示：「我好細個就出嚟拍戲，識咗好多朋友，朋友多到訊息都覆唔切，仲點會有時間玩app，再者依家好多詐騙案，所以大家要玩得小心。」

（即時娛樂）