BIG FOUR為紅館騷秘練絕技 許志安爆張衛健已訂櫈

BIG FOUR將於下月9至11日在紅館舉行3場《BIG FOUR HAPPY TO SEE YOU ALL演唱會2025》。距離開騷尚餘兩星期，張衛健（Dicky）、許志安、蘇永康和梁漢文（Edmond）密鑼緊鼓綵排和練歌，為演出做好準備。

Edmond笑言：「一定唔可以忘記有人要練蜈蚣彈同林峯櫈﹗」眾人追問Dicky練習進度如何？他說：「使唔使用2000幾呎排舞室嚟練？你畀個廁所我練吓就得㗎啦！」Edmond對他甚有期望︰「你要做30幾吓，成條沙甸魚咁，幅度動作大過林峯好多！」安仔突然爆料：「聽講你訂造咗張櫈！」Dicky不否認，但表演什麼就大賣關子。他笑說：「係訂咗張櫈，但唔係姓林，係姓張 ！今次擔保鍾意BIG FOUR嘅朋友，即使以前睇過我哋表演，都一定未見過我哋咁做，亦唔會諗到我哋會咁樣做。」Dicky預告會有大驚喜，還叫人上網撲飛，安仔和蘇永康立即提醒他，說門票早已售罄！

蘇永康透露：「今次我哋4個會一齊做一個樂器演出，大家都花咗唔少時間排練，Dicky真係付出好大努力。事實上，佢自己都好期待呢部分。」Dicky揚言：「係，光宗耀祖就靠呢一Part！」BIG FOUR曾試過兩次在台上夾Band，分別在BIG FOUR演唱會和安仔個唱上。Edmond說：「今次延續番個傳統，但肯定同之前表演好唔同。」

4子愈練愈弗，他們被問到會否在台上騷肌時，安仔表示不一定性感，但造型特別。Dicky建議安仔穿旗袍唱《喜歡你是你》，Edmond加入戰團：「開衩高到上腰！」

（即時娛樂）