東方日報C1：佘詩曼愛玩「午夜凶鈴」　密謀做監製

「三料視后」佘詩曼（阿佘）剛剛拍畢重頭劇《新聞女王2》，更已速速到馬來西亞搵真銀。日前本報直擊她與劇中「死對頭」養母夏文汐及李施嬅在中環街頭拍攝，兩代「霸氣女王」鬥戲，火花十足。演戲經驗豐富的阿佘，不諱言現階段想挑戰其他範疇，開拍懸疑劇做監製。

藝人佘詩曼、黃宗澤、高海寧、王敏奕、李施嬅等主演的無綫劇集《新聞女王2》正式拍竣，劇中大部分演員再次合作，默契十足下順利完成，而此劇亦暫定於今年成為台慶劇重磅推出。劇中靈魂人物「Man姐」阿佘日前與夏文汐、李施嬅於中環拍攝，首次跟劇中養母夏文汐合作的她，二人就如火星撞地球，一言不合就鬧交，不過，劇外她們合作得很愉快，阿佘受訪時謂：「我細個睇佢演出，已經覺得佢好有型，呢個女人好有性格，冇諗過可以合作，佢真係好適合呢個角色。」

除了鬧交戲，早前阿佘還拍了落水戲，她坦言幸好是夏天，加上自己熟水性，但也難逃耳仔入水的命運，事後要向網民求救：「有個鏡頭要我向後浸入水，拍咗好多次，我本來戴咗耳塞，但拍出嚟穿崩，所以要除咗對耳塞，搞到耳仔入水塞咗成晚，我有上網問大家有咩方法，有人叫我跳，我跳咗成個鐘，啲水都唔出來，好在最後冇事。」提到劇集煞科，阿佘直言大感不捨，已計劃之後會休息一段時間：「我想Refresh一下自己同陪媽咪，我已經Block咗呢段時間到10月，連續拍咗兩套劇真係好燒腦，雖然好享受，但的確係需要畀個腦休息。」

阿佘演出經驗豐富，做了演員多年，不諱言也有想過擔任監製，她解釋：「有機會我都想試吓，演員好被動，與其等人開戲，不如自己諗吓，又可以挑戰唔同範疇，但都只係好初步。」問到有沒有心儀劇本時，她又謂：「我鍾意懸疑劇，希望係全新原創劇，咁樣會有新鮮感。」當提議她做幕後可跟此劇總監製鍾澍佳合作時，她承認連續3劇跟對方合作後，自覺成長不少：「除咗演技成長之外，我都參與多咗，好多時會同佢溝通，我成日都話自己係『午夜凶鈴』，我凌晨2、3點都會傳短訊畀佢，傾吓有咩問題，大家有好多Brainstorm，我都學到好多嘢，好開心，對將來都有幫助。」提到鍾澍佳之前榮升「電視廣播有限公司副總裁（合拍劇）」時，她指前一天早收工，整個劇組都有一起食飯為對方慶祝。

夏文汐佩服「機械Man」

至於夏文汐受訪時自言劇中有不少激烈場口，因為劇中的她與阿佘性格都好強，氣場十足，她謂：「導演話搵我演，因為我嘅氣場可以壓得住佢，盡量啦，其實我好善良，我喺美國係做師奶，點知呢個角色係女強人，仲係新聞主播，不過唔緊要，玩吓啦！（你演得好入型入格。）導演話要Chok，我成日Chok樣，成個劇組都唔敢同我講嘢，搞到我幾咁寂寞。」說到首次跟阿佘合作，夏文汐直言十分開心，並向對方大派高帽：「佢係視后，可以同視后合作學到嘢，佢喺我心目中係『機械Man』，呢啲咁熱嘅外景場口，我個妝都溶晒，但佢都唔溶，好淡定，好犀利，我好佩服佢！」她指除了阿佘，跟劇中多位對手包括李施嬅、馬國明、黃宗澤、高海寧等全都是第一次合作，很有新鮮感及挑戰性，雖然拍攝辛苦，也非常值得。

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/