高海寧放假Mode啟動　想獨自旅行放空

藝人高海寧（高Ling）今日（30日）出席公開活動，之前因濕疹令雙眼紅腫的她表示現時康復不少：「我食緊中藥，戒咗類固醇，暫時係受控，我依家好關注健康，盡量多休息，飲食習慣都改變咗，會食原生食品，連衞生習慣都變咗，我用眼線筆前會先消毒。（回復靚靚拍劇？）呢個好重要，對眼係好大打擊，如果影響到我嘅工作表現，我會唔開心。」

提到她日前在社交網發文，宣布《新聞女王2》正式煞科，她坦言感到不捨：「我好鍾意個角色，令我嘅人生有好多感悟，拍完有少少失落，而且啲對手好好，我好期待套劇出街，預計今年尾播出。」

另外，近日適逢高Ling媽咪生日，她透露由於當日要拍廣告，故叫父母前來探班順便慶祝：「平時拍戲就唔會叫佢哋探班，因為時間唔穩定。（有冇機會母女檔拍廣告？）有都唔介意，我父母之前同我一齊拍過綜藝節目，去馬來西亞同新加坡，佢哋好享受，仲喺當地影婚紗相，算係完咗我嘅心願，哈哈！（媽咪嘅心願會唔會係想你結婚？）佢嘅心願係我健健康康，佢哋好開明，冇催我結婚，只要我開心就得。（咁耐都遇唔啱？）冇時間，依家工作為主，想做好啲。」

高Ling透露今日活動後便正式開始放假模式，會與蘇民峰到澳洲首嘗滑雪，她又謂希望有機會獨自旅行：「想去法國或意大利小鎮放空吓，睇吓花花草草，當地冇人識我，我又唔使化妝，我想生活吓，因為太耐都係拍劇，冇去好好生活，咁對演藝都會有所局限，要及時行樂。」

東網網站 : https://on.cc/東網Facebook專頁 : https://www.facebook.com/onccnews/