芯駖@COLLAR出新歌 為性感MV造型減肥

女團COLLAR成員李芯駖（Sumling）昨天（29日）推出以駕車為主題的新歌《POSH》，她表示歌曲十分特別，感覺似度身訂做。她說：「第一次聽首歌，就感覺好似揸車咁，因為我最近考完車牌，好想從揸車中帶出自己想法。揸車對我嚟講係一件幾有趣嘅事，但點解我咁遲先考車呢？因為我覺得自己唔適合揸車，但其實學車師傅話我揸得幾好，原來我一直畀自己嘅恐懼打敗，我想透過呢件事，反映日常生活有啲嘢，我哋係自己打敗自己，未試過就話唔得，但原來試咗之後係OK嘅。」

雖然《POSH》與去年推出的《SPYLING》同為跳唱快歌，但今次《POSH》跳舞上比較特別。芯駖表示：「搵咗日本排舞導師編舞，佢係一個好出色嘅老師，我成日喺Ig睇佢啲片，今次邀請到佢我非常開心，亦好多謝製作團隊幫我實現呢個夢想。」她表示今次MV比之前更性感：「當我知道造型比上次性感，我就落力減肥。依家我嘅體脂比之前再低咗，因為之前拍團綜，然後做舞台劇，跟住就錄歌排舞拍MV，冇乜放鬆狀態。」

芯駖表示母親在家中長期播放她過去的兩首作品，成為其流量擔當。她說：「媽咪都有嚟睇我做舞台劇 《你好，打劫！Reunion》，佢睇完淨係話『你都好辛苦，冇得休息，打呢份工真係好辛苦』，媽咪最擔心都係子女健康。」

提到COLLAR成員陸續考車牌，問芯駖決心考牌是否受其他成員影響？她表示：「有少少，阿Gao係第一個考車牌，我冇諗過自己可以一take pass，覺得自己冇乜方向感，揸落車先知自己好鍾意揸車，喺車入面好有me time感覺。」8月29日迎來COLLAR第2次演唱會，芯駖希望可以在演唱會當晚首次現場演繹《POSH》這首歌。

（即時娛樂）