娛圈單打︱嬸嬸粉絲求結婚　偶像服務超貼心

喂，今時今日世界艱難，就算係賺大錢嘅明星，為咗冧掂一班米飯班主，一樣不易為。嗱，近日網上流傳「教主」Anson Lo嘅粉絲服務短片，片中粉絲唔止要求同教主十指緊扣，仲話買咗樓求教主同佢結婚。大家估吓教主點反應？

段片係咁嘅，一位自稱「仙仙」嘅粉絲跟教主互動，輪到佢時，先係報上芳名，然後送上掛住一抽大鎖匙嘅公仔鎖匙扣，教主見狀都笑說「好大抽」，然後如仙仙所願，同佢十指緊扣。點不知仙仙仲未滿足，除咗要教主親口對佢講「仙仙我愛你」，仲忽然無厘頭問教主，如果買樓會買邊區。教主思索一會答九龍灣，仙仙即謂「尋日喺九龍灣買咗樓」，問教主可否同佢結婚！

嘩，唔係咁大整蠱啩？呢個時候，教主都不知點算好，眼仔睩睩四圍望，想向身邊工作人員求助，但試問仙仙咁熱情，點會有人忍心淋熄佢團火。教主支支吾吾咗一輪，最後順應仙仙要求，向仙仙求婚，搞到仙仙鬼死咁開心，笑住向教主道謝。

嗱，網民睇完條片，紛紛替教主感到為難，皆因聽把聲，仙仙年紀唔細，「耳測」係嬸嬸一名。而教主則係後生細仔，試問點可能娶個嬸嬸返屋企。不過教主深明粉絲只係出於愛意，並無惡意，決定逐一完成粉絲心願，獲網民大讚服務一流，對「神徒」真係好好，抵佢咁受歡迎。

相對之下，網民就覺得另一「鏡仔」姜濤，粉絲服務同教主差天共地。皆因姜濤經常被拍得對住粉絲一臉不耐煩。計本欄話齋，真性情還真性情，要紅得長久，絕對唔可以得罪粉絲，呢鋪教主完勝！

東網網站 : https://on.cc/東網Facebook專頁 : https://www.facebook.com/onccnews/