當奴自嘲天生外表乞人憎 曾遭聽眾去信電台投訴擺款

彭秀慧（KP）主持的ViuTV節目《晚吹-Chat KP》，今晚（24日）播出的第37集請來DJ當奴現身，討論「惡人」話題。當奴回憶多年前到旺角買遊戲，進店舖後需先經過光碟區，才能走到後方的遊戲區格價。他表示當日經過光碟區時，負責人問「喂𡃁仔！係咪買鹹碟啊」。他說當時自己沒回應︰「我冇出聲，因為嗰時已經有少少面子，有少少人識，要帶帽出去。負責人大聲呼喝『問緊你嘢啊』，再拍我頭上嘅帽，我只能唔理佢向前行。」

當奴自言被人誤會成「惡人」︰「我唔出聲個樣，好多人都話我係乞人憎、樣衰。真心嘅，我都覺得自己唔出聲個樣係惡，冇辦法。」他透露多年前曾有聽眾寄信去電台投訴，內容指「你個節目主持人，以為自己邊位啊，喺窩打老道嗰間銀行撳錢，喺度擺款啊，離晒大譜以為自己邊個」。KP笑言：「存款啫，唔係擺款啊！」當奴感到無辜：「投訴嗰個人係咪櫃員機呀？我喺櫃員機面前撳錢，佢點會見到我個樣啫！」KP解釋有時因為幕前身分，在電台建立了比較歡樂的工作形象，觀眾或許在日常中遇見未必笑面迎人的當奴就有落差感。

（即時娛樂）