杜德偉10月開紅館騷賀入行40年　老友林敏驄撐場但做嘉賓被拒

杜德偉（Alex）日前宣布為紀念入行40年，將於10月18至19日再現紅館舞台，舉行《Get Up世界巡迴演唱會─香港站》，今日（17日）舉行記者會以夏日派對「GET UP SUMMER BOOMB」為主題，DJ現場演繹多首廣東經典，吸引幾百歌迷圍滿觀眾，更找來多年老友林敏驄Jam歌。

杜德偉今日現身記者會，太太Ice和兒子AJ亦有現身，大批粉絲冒雨到場支持。Alex一出場以《愛變了這世界襯衣》揭開序幕，氣氛非常熱鬧：「呢個世界巡迴演唱會去了很多不同的地方，終於在2025年回到香港，其實香港對我來說是一個家、最親切的地方！」

杜德偉表示，相隔10年再開紅館，有種既陌生又熟悉的感覺，而今年剛好是入行40年，所以特別有意義。「歌單都唔係好頭痛，總之有求必應，我會將所有大家想聽的廣東歌唱出嚟！其實我希望今唔好下雨，但見到落雨大家都這麼熱情站在這裡！」

Alex指對上一次2015年開騷後，約2018年開始每年入紙，一直到今年才獲批，而原先獲批6月檔期，但突然被取消。「其實真係好失望，但突然間兩個月前又話有，當時好擔心準備足唔足，但好在我所有班底都出席。」他表示聽過不少歌手朋友入紙申請紅館大呻困難，自己亦不明當中的準則。「紅館雖然難攞期、但我都想做，我亦都同過梅艷芳、陳百強、李玟、徐小鳳喺紅館合唱，所以要做自己演唱會時，我都等。」

記者會期間，老友林敏驄突然上台做嘉賓，即席合唱1988年主持的無綫搞笑節目《點解咁好笑》主題曲《眼光光》，林敏驄稱呼Alex為恩人，因當年曾幫他代出頭，2人台上一唱一和，更扮互嘴製造氣氛。Alex說：「其實你哋可能覺得佢好難招架，不過我就識得點樣對付佢！近日都搵返好多舊時啲片段，真係唔明當年點解會肯咁樣做，都諗返起好多回憶！」而林敏聰揚言重拍節目，引起圍觀fans「喴嘩鬼叫」！

被問到演唱會嘉賓名單，杜德偉直言未打算邀請林敏驄登場，但有意請合唱《信自己》的葉蒨文（沙麗）。「我第1個騷沙麗當嘉賓，之後我也有為她的騷唱歌。40周年都想帶回憶給大家，但未知她意願，因為她都好忙。」Alex提起巡唱台北站，曾帶兒子AJ上台父子合唱《What a Wonderful World》，原因當年Alex也與已故父親合唱此歌，撞正父親13年忌辰，故以歌紀念，有傳承意義。

台上會否重現招牌《脫掉》，杜德偉透露每條《脫掉》戰褲都有保存。「今次係咩底褲？仲脫？60幾歲啦但有首歌《脫掉》所以唔脫唔得，但在喺表演嘅意識形態上會好澈底做畀大家睇。」杜德偉又指仔仔AJ懂得樂器，自己睇到蘇永康與仔仔在BIG FOUR演唱會合演，所以都想父子聯手演出。