東方日報C1：Edan化身大師玩自嘲　率萬人「爆粗」

人氣男團MIRROR成員呂爵安（Edan）前晚開騷，化身「兒登大師」講「祓經」，連環自抽兼大講粗口諧音棟篤笑，聯同逾萬粉絲齊齊高叫「關你諗事」，爆笑連場！結尾時他轉玩感性，自言被迫成長，但仍會堅持做自己認為對的事。

在亞洲國際博覽館舉行的一連3場《EDAN LUI "e to E" LIVE 2025》演唱會前晚開鑼，一頭金髮的Edan戴上枯枝面飾登場，唱出《純銀子彈》、《油麻地莎士比亞》及《天天都是愚人節》，其後換上多個造型包括窩釘衫及熊仔冷衫，又以皮革背心勁歌熱舞，再換上西裝Look晒琴技。

向來Talk得的他又設計一段20分鐘棟篤笑，化身「兒登大師」出場，並自稱「祓教」話事人，表示要助人祓（音：忽，是指一種潔淨儀式）除煩惱，又指有個名物叫「祓經」，當中有3條經文：「第一條係『做乜諗嘢』，唔係唔好諗，而係唔好亂諗嘢，仲有個變奏版『關你諗事』。」大講粗口諧音笑話。他還教大家活學活用：「拜年嘅時候姨媽姑姐問你點解仲未結婚，可以講乜呀？」全場大叫：「關你諗事！」他又向觀眾送上「做乜諗嘢」符傍身。

歌曲點擊急瀉

第二條經文是「來都來了」，揚言只要轉念便可解決煩惱，又3度自嘲：「例如我以前出歌好犀利，閒閒哋有幾百萬甚至二千萬點擊，但前排出新歌《我以為可以》，3個月得30萬點擊，我會諗一定係首歌太傷心，所以大家唔想聽。」又表示經常出現在一個叫「難聽歌手俱樂部」的網上頻道：「我轉念一想，頻道上其他歌手係Jer，我同佢係同一個俱樂部會員，咁知我咩料啦！」他又指妹妹「小如豬」的廣告比他多：「我轉念一想，妹妹搵到錢，阿哥可以退休，即係今場係尾場喎！」至於第三條經文，他笑言有待解鎖。

接着他介紹「師傅」羅家英出場，Edan問他日前為何率先自爆做嘉賓，羅家英詐傻反問：「我爆乜？」並重提醫病花盡積蓄，太太又不理他，搞到Edan急急煞停他：「唔怪得之阿姐（汪明荃）話唔好畀佢講嘢，你唔好再講嘢，我好驚！」羅家英卻繼續講，大爆平日叫Edan做「呠呠」，因他經常放屁，此時音樂響起，強行制止他說下去，兩人隨即合唱電影《西遊記》中的經典歌《Only You》。另外，Edan還邀得馬來西亞創作歌手菲道爾任嘉賓，菲道爾邀他合作寫歌：「我作曲，你填詞。」Edan卻拒絕說：「作詞不行，我寫的都是髒話。」又叫菲道爾以廣東話向觀眾大叫「祓你」，認真頑皮。

搞笑之餘，Edan亦流露感性一面，Encore後剖白自上次演唱會至今發生很多事：「個天逼我成長、大個、要改變，身邊好多愛我錫我支持我嘅人，包括在座每一位對我不離不棄，衷心多謝大家咁愛錫我，咁無條件同咁誇張。」他揚言會繼續做自己認為正確的事，行自己的人生路，無論未來任何階段、難關或挑戰，希望也有粉絲陪他同行。

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/