娛圈單打︱女神鬼死咁好火　人見人怕點合作

「甜寵女神」趙露思同經紀公司開火愈戰愈烈，頻頻親上火線開Live爆料，包括詳述如何被前女高層毆打，又自爆早前病入膏肓，公司竟然唔帶佢去睇醫生，而係鎖佢喺酒店驅魔，堪稱鑊鑊新鮮鑊鑊甘。

嗱，外界唔清楚佢哋之間嘅恩恩怨怨、誰是誰非，但露思BB擺爛擺到咁出面，分明就係博解約，仲要一個崩都唔想賠畀公司。之但係，佢同公司似乎仲有兩年合約，要無償解約真係唔容易，一下子將關係搞到咁僵，冇晒彎轉咁款，會唔會玩人變成玩自己咋？

呢，話口未完，露思BB就被指疑似造假。話說佢最近開親Live，都會有意無意直播帶貨，強調全部真心推介，並非收錢代言，甚至嚴禁粉絲打賞，因為啲錢要同公司對分，唔想益咗公司喎。

喂，講到錢都唔要，咁鬼真，粉絲梗係大受感動，對佢帶嘅貨大力支持啦。前陣子佢介紹一個蘋果乾，仲話自己係「助農」，點不知，好快就被揭發，廠商最大持股人就係佢閨蜜，懷疑根本就係佢嘅自家品牌。陝西農村局仲話從不發出助農證書，搞到好似有人講大話咁款。

唉，謠言滿天飛，露思BB深感委屈，嬲到即時注銷3千萬粉絲微博。其後官方又話曾經發出過助農認證，總算還女神清白。之但係傷害已經造成，坦率人設廣受質疑，仲開始有輿論認為，既想同公司解約，又唔想賠錢，天下間邊有咁便宜嘅事？唉，本欄淨係覺得，露思BB做戲咁好，《星漢燦爛．月升滄海》咁鬼好睇，若然因為合約問題危及星途，就算解約成功，日後可能冇人敢搵佢拍戲，咁咪好可惜？

東網網站 : https://on.cc/東網Facebook專頁 : https://www.facebook.com/onccnews/