東方日報C1：張敬軒為菠蘿包開戰　通宵駁火「教仔」

張敬軒日前在社交網分享近期至愛的芝士菠蘿包，豈料竟因此罕有與網民展開罵戰，5連發以千字文通宵「教仔」，怒斥網民粗口爛舌、陰陽怪氣！他昨日出席活動時怒氣未消，表示：「明明我冇造口孽，但係啲口孽就入我數。」果真「軒公」發火，非同小可！

歌手張敬軒向來喜歡在社交網跟網民分享日常及開心互動，沒想到近日卻因為一個菠蘿包而激起怒火，更通宵還擊「口痕友」！事緣他日前在社交網分享近期至愛的芝士菠蘿包，有粉絲特地光顧該連鎖餐廳試食，事後出Po大讚好味，豈料有網民竟轉發該貼文並指：「如果一個偶像講一舊屎好好食，啲Fans係咪真係完全唔用腦覺得偶像講嘅嘢一定係啱？」有人指出該餐廳用內地預製的冰鮮菠蘿包，認為張敬軒不應替其宣傳，甚至狠批粉絲「冇腦」盲目跟風。

賴Tyson傳染火爆性格

張敬軒徹夜回覆留言，解釋指本身並不了解該餐廳的背景，但認為網民措詞過火。該網民回覆時故作親切地以「軒」來稱呼他，並為「詞窮」而作出道歉，但張敬軒怒不可遏：「軒咩軒，你哋平時鬧我嗰陣時唔軒？喺呢度啲人咁大個人冇自主思考嘅能力？阿咩謏奉承呀？我又唔係皇帝，佢哋又唔係打我工，你覺得佢哋講嘢擦鞋，對我會有咩影響呢？你係咪覺得我傻㗎！」他在文中強調：「乜嘢叫做咁公開、咁大力咁樣去宣傳唔係咁有良心嘅大集團？我連佢係大集團都唔知，你有留意嘅新聞我見都冇見到！」他怒斥該名網民：「你眼見唔妥啲嘢、你覺得唔舒服啲嘢，你都搵我埋單。」他全程十足老竇教仔，指人見識多了，就會有多點同理心：「你唔明，等多幾年就明㗎喇！都癡癡哋嘅你哋！」

昨日出席活動時，張敬軒提到在社交網開火一事：「冇大火，教仔啫，有邊個做阿爸、阿媽唔勞氣。覺得佢哋有時喺網上講嘢冇禮貌，但用我個樣做Icon，人哋睇到會入我數。明明我冇造口孽，但係啲口孽就入我數，唔鍾意佢哋咁易『着』。明白依家網絡係一個發洩嘅地方，自己搞咁多講座，希望超度大家嘅EQ、IQ，希望大家和氣啲，財運都好啲。」他認為粉絲有不同教育背景，難免有文化差異，很多時他的一舉一動都會引起粉絲不快或有意見，他表示：「我話晒都係佢哋長輩，邊有後輩管老人家。同埋我比較傳統，唔鍾意女仔講粗口，今日撻着我係因為有幾個女仔講粗口。」又笑言最近因較常接觸Tyson Yoshi，變得不愛穿衣及喜歡鬧人。

提到受訪時聲沙沙，他表示是之前服用了哮喘藥所致，並指疫情後身體較差，感冒會病足兩個月，之後會多做運動。他又透露音樂學院快將開班，暫名「HINS ACADEMY」，入門班設有過萬名額，之後還會有進階班1對16人以及「天價」的單對單課程，將親自授課的他笑說：「我咁鍾意講嘢，好快啫，1日3班，每堂兩個鐘，大概幾百人一班。」他指開辦學院的原因，是眼見不少年輕人抱着躺平心態，或是對前景感到迷惘。他直言不會以歌唱比賽形式進行課程，反而像一間造星學校，希望讓學員認認真真學做明星。

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/