魯庭暉千字文感謝公司　自3年前MIRROR演唱會後首次再發文

早前ViuTV及MakerVille宣佈行政總裁魯庭暉離任，由金廣誠接任其職位，之後華納亦宣佈魯庭暉會在下周一8月11日起出任華納音樂集團亞太區總裁。相隔數日，魯庭暉在個人IG出長文，更提到自己英文名的由來。

魯庭暉的IG自約3年前MIRROR演唱會後便沒有再更新，到昨日才再出長文，當中提到他小時候到外國讀書時改英文名：「細個第一次去外國讀書，同學問我叫咩名，因為我冇好鍾意嘅英文名，而香港嘅朋友都叫我魯暉 。所以我就順口答咗佢哋my name is lofai. 住畢業，做第一份工，做第二份工，遇到好多上司同事客戶，有香港人有外國人，我都係用呢個名，到咗有一日終於有外國朋友忍唔住同我講你知唔知lofai 呢個發音係好似Lofi. 一聽個名就諗起Lofi music 。咁我就話我都唔知係咩嚟嘅，完全get唔到個point。」

之後發現其英文名發音是一種音樂風格：「Lo-fi（Low Fidelity）音樂係一種音樂類型和風格，特徵係故意保留錄音中嘅『瑕疵』，例如背景雜音、模糊嘅音效、簡約嘅旋律，營造出一種懷舊、放鬆、甚至有啲『宅宅』嘅氛圍。」
最後提到近15年工作：「15年。多謝上司，不斷俾唔同機會呢個瑕疵進步。多謝同事、客戶、合作夥伴，冇佢哋嘅努力同支持，所有美好嘅嘢都唔會出現。多謝觀眾聽眾粉絲用戶，俾到一個我同同事努力嘅原因。多謝台前多謝幕後。講到呢度，我覺得自己好似平時上台嗰啲歌手咁，一輪嘴講一串多謝說話 。我成日喺台下度諗，頂你哋班友係咪被迫講架 。到今日，我得到一個結論：其實多謝嘅說話，點講，都講唔出多謝嘅心情。『多謝公司』呢四個字係代表緊，多謝好多人。呢一班人，叫結伴。『是這些結伴，讓我擁有過豐盛，以我沾濕的眼睛，對美好光景致敬。』」