黃心穎出新歌 感覺如懷孕：真係有咗我係開心嘅

黃心穎相隔1年半再出新歌《看透世間美事》，她早前接受HOY TV主播Angela俞詠文訪問時表示心很累。黃心穎稱每次出新歌，心情都會緊張：「尤其係推出前嘅2個禮拜，我每朝早起身都會有一種肚痛﹑作嘔作悶感覺，真係好似有咗咁，但係到咗前幾日又好番喇喎，一諗到準備要宣傳，又覺得好攰喇！」

講到這首歌首度「棄用」丈夫黎萬宏（泥鯭）做監製，她笑言是故意的：「我想搵一啲新人合作，有新嘅衝擊，當然佢都有偷偷指導我，例如佢會叫我搵邊個做監製，畀啲guideline我，但真係冇參與，而個MV到最後先有我個樣，我喺特登嘅，我唔想出鏡，因為我驚要拍好耐呀，同埋啲歌詞已經好直白，鏡頭就朦朧﹑隱晦啲，唔使咁直接。」

黃心穎亦透露創作這首歌的時候，自己處於心累狀態：「當時係冇乜自信，有啲迷失感覺，但𠵱家好好多，識得點樣去面對，同埋調節情緒，唔可以畀佢影響到自己，當我面對唔好情緒時，我會直接面對，唔開心就畀自己喊，如果覺得好煩時，就畀3日自己，之後就唔可以再頹落去，要畀一個期限，亦唔好抑壓情緒，因為係咁累積落去，最後都係會爆，但係就算爆，我都唔會爆老公，因為佢嘅反彈力都好強，咁蠢嘅嘢我唔做㗎。」

對於黃心穎來說，近年最美好的事，是可以睡到自然醒，身邊的人和寵物身體都健康，提到生育問題，黃心穎心態隨緣：「如果呢一刻有，我會覺得好開心，如果冇我又唔會覺得好缺失，以前我比較想做媽咪，但係到咗我𠵱家嘅年齡，我連照顧自己都覺得好攰，如果再照顧多一個小朋友，我唔知我可唔可以應付到。」

（即時娛樂）