《Di-Dar (Comeback)》宣布加場 肥仔靠吹水混熟黃秋生

梁祖堯、湯駿業（Ahdee）、邵美君（阿君）、黃秋生、梁業（肥仔）及何洛瑤（Sica）主演的舞台劇《風車草黑心喜劇Di-Dar (Comeback)》，將於8月15日起假葵青劇院演藝廳公演，20場門票早前開賣後被秒殺，風車草劇團今天（31日）宣布將加開8月31日晚上8時的終極尾場，加場場次將於8月5日中午12時起公開發售。

眾演員知道加場後十分興奮，感謝觀眾的愛戴與支持。身為監製的AhDee表示今次絕對是加碼演出︰「上次反應非常好，特別劇中嘅組合RIP有一part嘅歌舞，係全場high到不得了，有觀眾更自帶熒光棒變咗RIP嘅粉絲。今次再做，我哋將成part嘅歌曲換晒新歌，所以如果上次有睇過，今次會發現啲歌轉晒，而且我哋仲搵咗一個專門排演唱會嘅編舞幫我哋重新排過啲舞，我哋rehearsal跳第一隻歌已經索氣，可想而知今次啲舞係勁咗幾多。加上今次有秋生同肥仔加入，秋生哥一早已經背晒台詞，一嚟到已經好似做過套戲。肥仔又估唔到佢咁鬼醒目，佢跳舞本身勁大家都知，加上佢肥嘟嘟好cute，出到嚟做佢呢個角色係咁啱數。」

劇中與秋生對手戲較多的阿君首度與秋生交手，十分難忘。她說：「秋生哥係我哋演藝嘅大師兄，佢係第一屆，我係第十三屆。最初同佢排戲好緊張，因為冇同佢合作過，佢嘅氣場都真係好勁，好有自己睇法，我呢啲師妹當然好驚啦，但係認真綵排，發現畀咩佢都接，所以發現喺台上面做戲時，就冇咗師兄師妹嘅分別，成個過程變得好enjoy好好玩，同埋可以反建議師兄。」問到阿君可擔心秋生屆時會爆肚，她笑言：「我都有少少驚到時會唔同晒，但我係有訓練，上次葛民輝都係成日有新嘅點子，我係非常活潑嘅演員，所以即管畀啲嘢挑戰我啦！」

作為大師兄的秋生，竟然表示今次是一個大挑戰。他說：「我未做過又跳舞又唱歌，就連電影、電視劇都未試過，今次應該係第一次，對我嚟講係挑戰，同埋咁嘅年紀同啲後生仔玩吓啦，睇吓佢哋諗咩，睇吓佢哋點樣排戲，走嚟學吓嘢啦！真係㗎！點知記2、3句歌詞，都記咗3個禮拜，記到我忟憎。」那麼跳舞可有難到他？他直言：「我不知幾驚，次次嚟到又冇人教，就睇吓隔籬點樣跳，但佢哋話OK吖，幾好呀，我走嚟運桔㗎，後來睇番阿葛（葛民輝）嘅戲，又真係運桔咋喎，又幾好。運桔唔係唔好嘢，係好嘢嚟㗎，聽起上嚟唔識嘅，以為係負面，其實唔係㗎。」

同樣新加入的肥仔，入行後第一次演舞台劇，他自言十分緊張，但有方法減壓。他道：「今次做舞台劇點都有少少緊張嘅，因為有秋生哥喺度，佢都係大師兄，演技超班，開頭見到佢心情好緊張，但我又有一種敬重嘅感覺，所以影poster已經撩佢傾偈。好開心秋生會讚我：『呀！你呢個肥仔都跳得幾好喎。』第一吓讚咗我，好似舒服咗，可以friend喎，跟住就開始同佢傾偈。我哋化緊妝嗰陣一齊聽歌，發現佢嘅品味幾好喎，係幾欣賞佢，合作起上嚟亦愈嚟愈舒服。依家同風車草keep住排戲嘅感覺係愈嚟愈好玩，成個劇太精彩，好多位好好笑，但認真嘅情感位置，我自己都乸住乸住，所以《Di-Dar》呢套舞台劇係一定要睇嘅。」至於上次有份參與演出的Sica，在台上表演側手翻贏盡掌聲，但今次她決定要將難度提高，她說：「上次《Di-Dar》有側手翻，今次重演呢啲招數實在係小絕，大絕嚟講會係一啲同信任有關嘅雜耍，平時大家喺陸運會會見到嗰啲，同跳躍有關嘅，我覺得大家睇到會『嘩』一聲，入場嚟嘩10聲啦！」

《Di-Dar》一直打破舞台劇常規，除了將殯儀行業搬上舞台，今次重演更推出首本由舞台劇改編的《Di-Dar》漫畫及figure，而負責設計figure的阿祖介紹道：「我人生第一次設計figure公仔，係AhDee叫我畫一個公仔，做一個Di-Dar BB，然後就覺得不如畫我自己個角色啦！公仔嘅特徵同我一樣，都係鼻哥窿大，同埋充滿憤怒嘅眼神，另外仲揸住桃木劍同戲中收鬼用嘅五雷符，極度像真。」

（即時娛樂）